【姿色中環】呢種市況最忌嘅操作（Samantha）

騰訊業績靚絕全城亢奮，開盤見340元的歷史高位，全城嘩然，繼而狂呼，準備高呼Gogogo之際，全日高位已見，無論大行目標價有多高，都難阻短線博業績的炒友食糊的決心，業績經過10多個小時消化，沒新一輪催化劑下，回調亦都合乎情理，反之指數就出乎意料地弱，故這階段操作是：現金倉、揀靚股、忌磨爛蓆。

港股距離上周五反彈逾400點，近日反彈浪呈梅花間竹的走勢（一日陽燭、一日陰燭），一個強勢反彈讀書也學過要一鼓作氣，未能夠一鼓作氣？再而衰，三而竭，現時按劇本走勢來說，港股未見有抽升動力，那係咪睇跌呢？咁升同跌之間，都有橫行的選擇，所以Sam選擇現金倉，唔太重倉，如果唔係畀息都輸死。

今日騰訊和恒指齊齊大熱倒灶，可能令炒友們感覺頗差，若攤開恒指週線圖來看，圖表仍未破壞，如果沒跌穿上周五的低位，仍未需要太擔心，只需要揀好股，坐定定就好。

揀好股最佳方法，不外乎揀業績靚。以及未被上周跌市打散的股票，揀定就離手，切忌在賭枱面前磨爛蓆，以防坐這山望那山，炒出炒入得個吉。

昨日航運股板塊大放異彩，太平洋航運（2343）升逾一成，又是摩笛在奏樂，大摩指波羅的海指數自7月以來已累升37%，乾散貨航運市場已進入旺季，預計超輕便型散裝及輕便型費率可於未來兩三個月走強。波羅的海指數的確近月走強，只是再次陷入兩年來的強大阻力區，實波的指數待破位再吸納航運股是較理想的選擇。

https://www.facebook.com/stocksamantha/