【我係邪惡HR】最後一刻先留人有用咩？（HR小薯蓉）

【我係邪惡HR】最後一刻先留人有用咩？（HR小薯蓉）

人越嚟越難請，相信係每間公司都面對緊嘅問題。無論係前線定後勤職位，HR都為咗消滅空缺而煩惱。各個部門老細叫曬救命話自己唔夠人用，表示請人嘅準則係「有呼吸」就得。不過無論請人準則有幾低都好，啲人請極都永遠唔夠，因為好多時呢邊請完，嗰邊又會有人走，感覺就好似不停喺一個穿咗窿嘅水樽入面加水。

請人難，好自然會諗下點留人，不過好多公司都係頭痛醫頭，腳痛醫腳，臨到最後一刻先出手。但好多時exit interview同辭職嘅同事傾計，發現最後一刻先出招，往往都已經太遲。

1.唔係一朝一夕嘅事

留意返，一個有啲年資嘅員工打算辭職，通常都唔係一朝一夕嘅事。對於佢地嚟講，辭職呢個念頭通常都已經醞釀咗好耐，思前想後先再搵工走人。其實問題可能已經存在已久，只係老細一直察覺唔到，又或者視而不見。

2.遲來的加人工

好多主管收到辭職信之後，第一件事就會要求HR加個同事人工。加人工當然好，如果本身個同事人工過低，可行嘅話，其實一早就應該加，而唔係等到佢想走先加。去到辭職一刻先加人工，員工被忽視嘅負面情緒其實一早已經形成，一切可能已經太遲。

3.未必關人工事

有時人工未必係員工想走嘅唯一因素，就算用錢留得住個人，都未必留得住個心。見過好多例子，就算有人工加，員工都拒絕唔肯留低。除此之外，亦有情況係係加咗人工之後暫時留低，但係冇幾耐又再請辭。

4.長久問題

令員工離職嘅因素有好多，好多時都未必係我地可以控制到，但係如果員工嚟嚟去去都係因為嗰啲原因辭職，唔解決嘅話，唔夠人用呢個問題只會不停來回地獄又折返。

如果真係真心想留住員工嘅話，最好就唔好等到最後一刻先行動，心動不如行動，遲咗就冇用。