香港股市 將收市,收市時間:1 小時 55 分鐘

【我係邪惡HR】離職留一線 Reference Check好相見(HR小薯蓉)

【我係邪惡HR】離職留一線 Reference Check好相見(HR小薯蓉)

要數人生最爽嘅事,炒自己討厭嘅腦細魷魚絕對係其中之一。 以前為咗份工,佢鬧你都要死忍爛忍,幾不滿都要繼續做, 今日你終於可以結束呢一切,畀封信你腦細然後大大聲講:「 我唔撈喇! 」。不過,同腦細講辭職只係一兩分鐘嘅事, 因為喺香港做嘢一般都有離職通知期,所以爽完一兩分鐘後, 仍有一段時間要面對你腦細。呢段日子裡面,有啲人選擇好嚟好去, 但有啲人就選擇「呢世不相往來」政策。

小王子係一位喺外國讀緊完大學嘅年輕人,佢因為有人介紹關係, 入咗薯仔公司做一個行政嘅職位。 佢嘅職位係薯皮生產部嘅行政助理,日常處理一般文件工作。 唔知係咪因為份工得來太易關係,工作表現只屬一般。 不過佢始終係畢業生,主管對佢要求都唔係特別高。

做咗兩個月,有一日小王子突然向薯皮部主管請辭。 由於佢合約需要一個星期通知期, 所以佢要留喺公司做多一星期或賠償一星期代通知金先可以離開。 小王子選擇咗前者,不過從遞信那天起佢竟不辨別前後、調亂左右, 上司叫佢行左佢行右,叫佢做前面嘅嘢佢就偏做後面先。 態度變得惡劣之餘,工作亦開始hea做,結果佢同上司不歡而散。 佢呢段時間嘅表現亦被記入佢喺HR嘅個人檔案中,「 不建議再聘請」一欄旁邊被剔上一剔。

當佢以為離開咗以後都可以不相往來,幾日後, 薯仔公司收到佢新公司嘅Reference Check(資歷調查)。Reference check表格上面通常都會問一啲評語,另外亦會問「 是否會再考慮聘請該員工?」。呢一句往往喺Reference Check嘅重點問題,就算冇寫評語,如果剔咗不考慮聘請, 新公司點都會知道「有啲問題」。HR一般都會跟過往紀錄回答, 小王子呢個case亦唔例外。 小王子新公司收到回覆後亦打電話嚟追問原因, 雖然我地就冇特別再加上評語,但新公司似乎對佢嘅表現有所保留。 最後新公司有冇請佢我地不得而知,不過從呢件事我地知道, 離職留一線,日後就算不相見,至少都要令Reference Check好相見。