【我係邪惡HR】HR的壓力來源(HR小薯蓉)
喺好多人眼中,HR日日準時收工係一件非常合理嘅事。「請下人、炒下人,呢啲都係HR畀壓力人啫,自己邊有壓力㗎?」「出糧?都係電腦出㗎啦~駛乜HR做?」「平時佢地都係出下信咁,有曬sample好易出。」所以結論係,如果你想準時收工、星期六、日有假放,過住冇壓力嘅生活,咁你去做HR啦。
如果你真係信咗而走去做HR⋯⋯咁就祝你好運。
HR嘅工作當然冇咁簡單,壓力嘅來源可以有好多種:
1.請唔到人嘅壓力
HR成日痴住班老細不理民間疾苦,但你可能唔知終日與老細為伍係幾大壓力。喺工作上,HR需要同所有主管有緊密嘅溝通,而且如果請唔到人,就會被所有主管瘋狂追問:「有冇人見呀?」每日都要承受住請唔到人被問候嘅壓力。
2.工作量及準確性
唔好睇少出糧呢件事,每個月嘅事前準備、花嘅時間絕對比想像中多。為咗確保準備性,HR都要花大量時間去仔細核對。負責Payroll嘅人手通常都唔太多,有時甚至要兼任埋其他請人等等嘅工作。但作為一個支援性部門,要問老細請多個人難過叫佢加人工。
3.大老細
公司所有政策都要大老細首肯先可以推行,員工政策亦都唔例外。如果想爭取多少少福利HR要準備詳盡有說服力嘅計劃書。如果唔好彩老細要縮減員工開支,又會捽HR諗下慳錢大計。
4.處理員工問題
HR要負責處理所有同員工有關嘅問題,包括投訴、糾紛,甚至係聽同事訴苦等等。喺工作上,同事之間會有不和、同事同老細又會有糾紛、有時同事太大壓力又要搵人傾訴,HR有時可以話係公司嘅負能量接收器,唔識舒解壓力真係隨時崩潰。