【樓市贏家】加價五成的條件（徐峰）

雖然香港人人以買樓為終身目標，就算樓價再高，都勇於入市，而一班慣得無厭的發展商，經常以不同借口加價，但又是否每次能成功「扑傻瓜」呢？就好似今年3月賣個滿堂紅的Monterey，上星期重推，呎價足足比9個月前貴五成，結果到昨晚為止都只收到80飛，星期五到底會賣成點？真是要放長雙眼看清楚。

其實今年3月Monterey推售時，曾經是城中最紅的新盤，首批呎價低於萬元，搞到小紅姐同娜姐兩個不同年代的女神都入市，迅即賣出600幾個單位，不過，發展商會德豐就忽然封盤，有人就話係老闆講得賣平咗所以要封盤加價。

事隔9個月，發展商上星期忽然宣布解封，不過，推出138個單位，平均呎價就加到二萬一，比3月時足足貴超過五成，雖然發展商就話這批單位臨海、景觀最靚，仲改埋個名叫Grand Monterey，但對比同一「柱」單位，相差一層都賣貴3成幾4成，咁實際上同景觀有咩關係呢？根本就是貪！

好啦，到星期六開始收飛，一般來說首日收飛，加上又是周末，反應正常會是最熱烈的，但聽聞當日睇樓客人丁疏落，仲連10飛都無，莫講話足額認購，到周一會德豐終要公布銷售安排，為免成為難得「唔足額」的一個盤，就唯有扮措售，少少地推出38伙，仲玩即推抽籤，即叫齊全部入飛客到場，先慢慢抽籤，扮曬有氣氛。不過，始終到昨晚為止，都只收80飛左右，雖然比38伙超額一倍，但相對新價單中的138伙，實際仍未足額。

其實，貪心的人又何止一個，眼見新地賣南昌站都賣到兩萬幾銀一呎，一房單位過千萬都有承接，遠東一於照炒，傲凱首批折實都近兩萬，不過，匯璽有新地牌頭、鐵路上蓋，又有大型商場，仲有海景，傲凱呢？單幢樓無規模、品牌唔靚、近舊區，得幾間舖仔，莫非你又當自己樓神？結果聽講幾日來收得廿多飛，陰功都是自找的！