雅虎香港財經 【樓市贏家】香港人的執著——一定要買樓（徐峰）
香港樓價長升長有，除咗先天性地少人多、後天又有賺到盡的發展商之外，有時筆者會覺得，由唔知幾時開始，香港人就是無樓唔做得人，無論發生咩事，價錢去到有幾瘋狂，都一定要買樓，呢種特性都是樓價長升的原因之一。筆者最近識到一個人，令我知道原來香港人，就算不是大富大貴，對買樓都是十分執著的。
是咁的！早排有個朋友打俾筆者，就話佢有個朋友俾人呃咗，買咗個新盤單位，明明見得少少海話係全海景，仲要本身已經係貨尾，叫佢入咗飛抽到再諗要唔要，點知去到根本無人，行埋去就買到，俾完成千萬買完之後先發覺比樓上樓下貴咗好多，於是唔服氣想唔要個單位，但又唔想俾人沒收幾十萬訂金，問筆者可以點做。
當時筆者心諗，比成千萬買樓，事前唔知咩景，唔知樓上樓下咩價，根本就係你個人有問題啦，仲要撻訂個想拎返錢，發展商想做比你都唔得啦，因為一手新例講明撻訂劃一殺5%訂金，同埋，你話個代理點呃你都係你講，無證無據，又唔係發展商呃你，憑咩叫你唔殺你訂呢，於是筆者輕輕帶過答幾句就算數。
點知過咗一排，喺街撞到個朋友，就係同埋呢個同事一齊，佢得知筆者身份之後又問，邊度邊度好唔好，平唔平，買唔買得過，一輪亂槍掃射問到筆者頭都暈，而筆者就話邊個邊個屋苑唔係咁好，其實都唔算抵買之類，但其實當時心入面諗，乜你唔係俾人殺咗幾十萬訂咩？你都係做緊普通銀行職員仔，幾十萬應該都唔係少數，點解咁快可以重拾買樓那團火呢？
事後筆者同本身個朋友講開，佢就話，佢同事本身有層舊樓，聽人講邊度好所以想換樓，不過最新已經又有新方向了，話佢上網睇人講唔知點樣同啲三唔識七、純粹一齊參加唔知咩樓市講座嘅人夾埋買舊樓，之後改裝收租又好，等收購又好，筆者心諗，乜真係咁死心不息咩？我無話買樓唔好，但呢個朋友嘅同事，你好似失去咗少少理性喎！其實筆者身邊都有啲富裕朋友，佢哋外地來香港做嘢，錢唔係無，但就係鍾意租樓多過買樓，咁其實，外國人同香港人對置業嘅心態係咪真係咁唔同？
=============================================
