【樓市贏家】一個單位劈價4000萬 衝唔衝入市？（徐峰）

當之前個個發展商都話加息無影響，貿易戰又話唔關香港事，供應多又話需求更多，但事實就係，呢幾個月市場不斷出現二手減價、新盤滯銷、就連山頂地王都要流標，咁係唔係真係無影響先？

其實自從6月林鄭公布娥六招之後，碰巧中美貿易戰都不停升級，股市近排都跌咗幾千點，日日睇報紙都會見到二手減價，細屋苑業主一向持貨能力比較差，減價一、二百萬已經濕濕碎，筆者有聽聞，部份中半山豪宅業主，本身叫價已經比樓上樓下平兩成，近排見成區都無乜成交，一於再減，再劈成2000萬求甩貨，減完之後叫價足足比樓上樓下平咗成4000萬，如果用金額計，都可能係近期減得最多嘅單位。

新盤又點睇先？之前好多人話，新盤有好多付款方法，又長成交又高成數按揭，所以個價錢高少少都大把人搶住買，但係呢，近排好幾個新盤，推出以來的賣得唔太好，好似筲箕灣個逸瑆咁，第一日賣完5間就無咗影，減價再賣都係賣多6間，後尾仲有一間撻埋訂。九龍區呢？鯉魚門個盤講到自己有幾矚目，但第一日推130個單位，賣得40幾間，即晚仲係咁甩單。掃管笏個上源又點？雖然頭日輪三百幾間好威咁賣清光，但第二輪即刻賣得一半左右，臨尾仲有成十粒撻訂。

咪以為剩係小市民小業主先至睇淡，上星期招標嘅文輝道地皮，招標嘅時間好威水，有人仲吹到佢市值400幾億，不過到截標時，得5個財團入標，其中一個仲要有成六份人夾，反應都已經麻麻，誰不知最終仲流埋標。雖然有發展商就話同個市唔太關事，只係空置稅計唔掂數，但係都有人講，話呢幾個星期個市變化太大，發展商出價同政府心目中口價有距離所以流標，咁係唔係即係暗示有部份發展商對後市睇法已經無之前咁好？

不過咁，講到個市有幾差，你睇啱啱截止嘅居屋，收成25萬份表，成50幾個人去搶一個單位，即係話香港人其實都仲係好想買樓，只係會唔會喺呢一刻用咁嘅價錢買咁解，所以都有人話，「跌還跌，唔會跌得好多，平少少都大把人衝入市啦」。

=============================================
中小型代理行大匯集 Yahoo!搜尋器筍盤最多最齊