【樓市贏家】刨晒本樓書都唔夠？買樓前請睇多樣嘢（徐峰）

筆者過往都不只一次同大家講，買一手樓記得睇樓書，因為入面有好多資料係代理同發展商都唔會同你講的，例如上星期講，睇樓書睇吓邊個負責起樓，或多或少可以估到建築質素，又或者如果個盤喺山坡旁邊，自己駛唔駛負責咩費用等，但其實，有啲資料反而政府規定唔俾寫在樓書內，所以呢，平時發展商印的小冊子都係有參考價值。

記得幾年前政府推出一手新例，除咗賣樓手法、價單等有規管之外，樓書都係重要嘅一環，好多以往唔會喺樓書出現嘅嘢都規定要加入樓書中，令市場當時出現過起過1500頁嘅樓書，呢個歷史至今日依然未有人打破。

不過唔好諗住厚就乜都有，有啲以往會出現喺樓書，或者發展商會公布嘅嘢，依家都唔會再印喺樓書入面，而呢啲其實對買家嚟講可以好重要，好似管理費咁，當時政府好似話個盤未入伙，管理費都係估計，仲會有變，唔係實際數字，所以唔應該寫落樓書。

自此之後，好多發展商大條道理唔公布管理費金額，問佢都話政府唔俾講，不過依家啲管理費咁貴，至少都四五蚊一呎起，豪宅盤隨時過10蚊，即係一個單位分分鐘一個月幾千銀管理費，有啲豪宅仲要幾萬蚊一個月，對買家嚟講都唔係小數目，應該要俾客知，有啲發展商就會靜雞雞寫喺宣傳冊子入面，所以小冊子都有啲資料係值得參考。

另外有樣嘢筆者都唔知點解唔可以寫落樓書嘅，就係潔具或廚櫃嘅牌子，雖然樓書規定所有家電爐具都要寫牌子寫型號，由冷氣到抽氣扇都要寫，但係就算用緊一百幾十萬嘅名牌廚櫃，就係唔可以寫喺樓書入面，要睇咩牌子就要去睇示範單位入面個牌仔喇，其實呢樣嘢雖然影響唔係好大，但作為買家都有權知，點解又唔可以寫入樓書呢，其實有時啲官諗嘢真係幾難明。

=============================================
中小型代理行大匯集 Yahoo!搜尋器筍盤最多最齊