【樓市贏家】千萬豪宅 平民家居？（徐峰）

上星期跟大家分享過一個手揸200萬首期都不敢買樓的故事，好多讀者都覺得有人俾200萬自己點解唔去買，不過，喺現今的香港，樓市癲過宇宙級，就算你有1000萬預算，已不算甚麼。

就在剛過去的聖誕假期，昔日的悲情城市，天水圍嘉湖山莊，就有一個景湖居頂層複式單位，以高達1360萬轉手，雖然以實用面積1280呎計，實呎只係10625元，並不算是新高，但以成交價計算，卻是天水圍有史以來最貴，即是說，就算你有1000萬在手，在山旮旯地區都未必可以買到心頭好。

其實1000萬這條界線，以往可以說是豪宅的代表，同人講你住層成千萬的單位，好似好威水，不過，今日今日，可能只夠買蝸居，絕對是港人悲歌。

好像早排新地推售的南昌站匯璽二期，一房單位成交價最高過千萬，話就話樓盤有品牌效應，又有鐵路優勢，但始終就是位於深水埗區，我並不是要歧視住在深水埗的居民，但據政府統計，深水埗在2016年仍是全港是住戶入息中位數最低的地區，住戶每月收入只有2.06萬元，即是說，1000萬已等如區內一個家庭485個月，即40年的收入，但都只能買到一個一房單位。

新界區又如何？今年初新世界推岀的荃灣柏傲灣，一個實用面積421呎的一房單位，定價近1180萬，雖然單位至今仍未售岀，但若然賣岀，將是新界區有史以首次有一房單位以過千萬賣岀。

至於樓價一直領先的港島區，1000萬大元，其實，分分鐘只夠買一個開放式單位。所講的，又是新世界旗下樓盤，位於西營盤站隔離的單幢樓瑧蓺，一個只有221呎呎開放式單位，定價竟然高達1003萬元，呎價超過4.5萬。想平少少買二手樓？無話唔得的，但都唔會好好多，好似太古城咁，兩房最貴已經去到1200萬，相信唔使好耐，太古城1000萬以下放盤即將絕跡。

即是話，如果你是一個千萬富翁，想買層新樓可能只可以買到一房或者開放式的劏房單位，如果想住大少少，麻煩你只可以住返又遠又舊的二手樓。