香港股市 已收市

【樓市贏家】官方都教人回佣 代理食乜?(徐峰)

香港人實在太識得討價還價,作為消費者,當然會覺得越平越好,最好免費,但同時就剝削咗另一班人應該有嘅嘢,好似依家好多人買樓賣樓都鍾意叫人減佣或要回佣,搞到班靠佣金維生嘅代理鬼殺咁嘈。

其實要求代理減佣,或者買新樓時叫代理回佣,好似變成係一件好合情合理嘅事,早排甚至有專家喺網上教人傾回佣,連地監局都出咗一段短片,提及所謂的優惠及回贈,被人話官方教人回佣,兩單嘢都搞到班代理群起反抗。

鬼咩,本身班代理底薪低到不得了,就係要靠食佣金先發達,你公然教人回佣即係斷人米路,實嘈你啦。

有啲人又真係有啲過份嘅,早排同個豪宅經紀傾開,佢話做咗單生意,成億銀,理論上買賣雙方各畀1%佣,加埋應該有200萬,拆返俾公司後自己大約袋40到50萬左右,都算唔錯啦,始終成億銀嘅買賣,一個豪宅代理一年都未必有一單,平時都係做吓租頂住吓。

不過呢,成億一單嘅成交,好多時班業主同買家都唔會畀足佣,好似上面單刁,買賣雙方都只係肯俾0.5%佣,個代理就白白收少一半。咁問佢係咪好慘,佢話,都未算啊,豪宅客肯畀半隻算好啦,有啲只係肯俾0.3%;有啲恃住自己貨多嘅所謂大業主或者炒家,直頭唔肯畀佣,覺得我畀生意你做已經係益咗你啦,你收人哋佣就得啦,有時遇著同其他行家合作,又少一半,外區同主區合作又跌啲,跌吓跌吓好似都無乜得剩。

講到呢度,筆者忽然明白點解自己撈到今時今日都無發達,因為唔夠孤寒囉,我成日都覺得人哋幫你做咗嘢就應該畀錢,係天經地義,最多叫人平少少,劈人七成佣或者完全唔畀,我就真係做唔出,人哋都要養家都要食飯,你買得成億樓身家都絕對唔會少啦,幾十萬可能飲幾支酒都無咗啦,咁點解要搞到人做完嘢得唔到應得嘅報酬呢,所以筆者都覺得大家要取得個平衡點。