雅虎香港財經 【樓市贏家】新地霸王北角出手 新世界無奈避走（徐峰）
有時一個人的影響力，除了可以在公司橫行之外，更加可以影響整個行業，好似北角兩大豪宅新盤對戰，雖然新地海璇暫時還是招標推售四房向海大戶的階段，但已足以令到新世界以貼市價推售柏蔚山，首批呎價僅兩萬八。雖然你可以話北角並不是甚麼高貴地段，但當新界二手山旮旯劏房都賣兩萬蚊呎時，柏蔚山呢口價都算幾保守。
講番少少歷史，海璇前身本來只係北角邨，雖然只係公屋的背景，前方更是全日車來車往的東區走廊，但由於前面正是永久無遮擋的維港景，加上新地樓神的威力，令項目成為港島東指標，呎價更賣到六萬幾銀，貴過唔少山頂樓，震驚地產界，所以每次海璇有咩搞作時，好多發展商都避之則吉。
咁到底其他發展商又有幾驚同海璇同期有新公布呢？好似上星期咁，本身新世界已經計劃好會開柏蔚山示範單位，不過呢，忽然間新地話開海璇示範單位，仲約了一班傳媒高層食飯，嘩！之前去海璇睇吓樓都要俾700萬做誠意金，今次免費有得睇，仲唔搶曬鏡？仲要唔知會唔會忽然間開埋價，所以新世界即刻改今個星期先開示範單位畀班傳媒睇，仲要當時市場流傳一個來歷不明的訊息，內容是咁的「由於暴龍霸道！橫行無忌！故柏蔚山將暫延遲」。
延遲開示位仲未夠，雖然柏蔚山位處北角，既非半山，又非臨海，加上單位面積偏大，兩房都七百幾呎，令到總價有所提升，但原本樓盤是豪宅包裝，首批價單平均呎價不應只是兩萬八，這只是恒地蚊型盤君譽峰的水平。市場估計發展商可能怕海璇七月公布價單，然後作大規模銷售搶客，因此務求在新地出手前，盡快賣得幾多得幾多。
話時話，以前新世界有「大王」座陣，雖然佢人緣就一般，又出名惡死，但正正因為咁樣，好多代理都怕咗佢，所以都好少因為其他發展商有咩動作而改期，唔知「大王」離開新世界之後，仲有幾多人會俾面佢哋呢？
=============================================
