雅虎香港財經 【樓市贏家】睇樓除咗帶BB同狗仔 仲要帶老人家（徐峰）
「家有一老、如有一寶」呢句話真係無錯，除咗平時生活細節上可以照顧到下一代之外，就算係買樓、租樓，老人家同樣「大派用場」，雖然唔係個個老人家都係業主，但做咗幾十年人，睇過嘅樓點都多過你，好多時啲細節位真係佢哋先知，同埋老人家有另一個強項係好過唔好後生仔，就係講價！
筆者撈咗地產呢一行都有十年八年，新盤好、二手好，租又好、賣又好，都睇過唔少樓，都有一定嘅經驗，但係呢，近排筆者同一個朋友去睇樓，而個朋友就帶埋佢uncle一齊去，初時筆者都心諗，帶個阿叔嚟做咩呢？點知一入到單位，見阿叔嘅一言一行，小弟真係甘拜下風。
好多時睇樓，大部份人都會睇景觀先，可能呢樣嘢真係比較吸引，跟住會睇吓間隔度吓下，睇吓個單位實唔實用，始終即使呎數一樣，但間隔唔同，差別都可能好大。咁筆者見到阿叔一入屋走去窗邊，心諗，阿叔你咪又係俾個景吸引到，點不知望多兩望，佢係望緊窗大廈外牆嘅位置，之後仲細細聲同我朋友講：「啲料唔得，用幾年就漏水」，仲話，阿邊個邊個發展商專用呢啲料，阿邊個邊個就唔同呢，唔會用呢啲咁流。
當時筆者心諗，嘩，阿叔，咩料啊？講到自己知道晒邊個發展商用咩料，邊隻料有咩特性，你起開樓㗎？事後同個朋友傾偈講開呢件事，阿朋友話，雖然阿叔唔係咩勁人，唔係做開地產，又唔係咩大業主，但係呢，佢有幾十年睇樓經驗，事關佢嘅興趣就係睇樓，每逢有新盤都會去睇示範單位，新盤入伙又會去睇租盤，久而久之就有好多經驗，兼且係經歷咗幾十年香港樓宇變遷，知道嘅嘢多過好多現任地產商同代理，所以先特登帶埋佢去睇樓。
當然啦，有時帶埋個老人家去，都係想搵個人開口講吓價，始終後生仔面皮薄，唔夠厚顏講價，好似之前有個朋友去買樓，業主開價680幾萬，佢初頭想業主減少少，業主就隨量減咗5萬銀比佢，咁呢個朋友見其實都算市價，都打算話ok，點不知陪佢去嘅伯友一開聲就要人減30萬，當時我朋友都呆一呆，而業主當然都唔肯啦，但最終都減咗成12萬比佢，雖然，多7萬又唔算好多，但總好過無啦，所以話，睇樓除咗帶BB同帶狗仔，帶老人家都好重要。
=============================================
