【樓市贏家】買華懋唔傻 發展商排名大執位（徐峰）

全城樓市再陷瘋狂，以往跟漏水樓幾乎畫上等號的華懋樓，都成為被搶購對象，首批開賣勁收二萬幾票，成本港史上收票最多新盤第三位。不過，平心而論，近年華懋樓質素可謂大躍進，早已爬過不少名牌發展商頭，反而個號龍頭發展商，傳到第二代、第三代，質素已大不如前。

其實，近年不少發展商都已經過經歷改朝換代，好似華懋，隨著小甜甜的離開，處事作風已大為不同，早幾年就連奪多幅地，在建築設計上，除了參考其他高檔新盤之外，亦起用興建過唔少甲級商廈同頂級豪宅，例如傲璇、MOUNT NICHOLSON的金門建築，令到交樓質素大為提升，所以華懋賣樓，不時都會把金門掛在咀邊，希望洗底。

另一個經歷改朝換代後質素大翻新的，應數到新世界，還記得十幾廿年前發售的樓盤，經常都有不少負評，地台斜到放唔到櫃只係等閒事。不過，由彤叔傳到純官，早幾年到第三代鄭志剛掌權，當時公司已岀現大地震，堅叔、何太先後離開，轉工的轉工，退休的退休，除了請來信和老臣子楊文坐陣，還有一班年輕人做Marketing，雖然次次都sell自己做文化企業家鄭志剛，大搞The Artisanal Movement，感覺較離地，但現時起的樓可以話唔打得都睇得，好似早排以現樓真身示人嘅清水灣一個豪宅盤，雖然位置比較吊腳，但都做到靚價，還有唔少名人捧場。

但又咁講，是否每一個第二代上場，物業質素都有進步呢？還記得阿媽嗰代，買樓好多時都會買長實樓，聽講好多七、八十年代的長實樓，質素都算唔錯，不過，如果你有留意地產新聞，睇過有關驗樓的報導，都會發現近年大部份由長實起的樓盤，收樓都有不少問題，就算係焦點豪宅屋苑，講到建築費幾貴，都敵不過風吹雨打，例如藝人陳浩民屋住那個屋苑。

說起這三個發展商，忽然想起他們的共通點，就是今年都在荃灣西有推過新盤，一個賣海景同設計，一個sell站頂夠方便，一個勝在平，如果3個同時推售，唔知最終鹿死誰手呢？