香港股市已收市

【異動尋寶】光伏大旺 吼實孖寶(魏力)

(Photo by Kevin Frayer/Getty Images)

個市上到29200再次發呆,悶到魏力幾乎想熄機午睡,但強股繼續輪流表現,上星期衝到外太空的瑞聲(2018)、舜宇(2382)終於唞唞,有貨想食魏力絕無異議,但點都留番些少,當mon住隻股,因為一畀佢放甩咗就好難再上番車。

資金搵主題去炒,光伏股又成為落鑊對象,皆因內媒消息指,第四季為傳統行業淡季,但大陸光伏市場卻繼續「產銷兩旺」,多數企業仍處於「滿產滿銷」的狀態,主要受惠於分佈式光伏裝機量大幅增長,四個字:豬籠入水。龍頭保利協鑫(3800)拾級而上,但魏力還是較喜愛陽光能源(757)。數週前在0.26元首次推介,目標睇4毫,結果去到0.395就打回頭,在3毫上面橫行一輪後,昨日再次起動,大陽燭爆到0.36元,行業氣勢咁旺,呢轉衝到5毫都唔奇!

陽光能源是中國單晶硅片廠三強之一,近年行業捨多晶、取單晶,皆因單晶產品由光轉電的轉換率,遠較多晶為高,有助降低發電成本,切合分佈式發電的需要,故集團可說是食到最應的光伏股。參考大陸光伏龍頭隆基股份估值,市盈率28倍,而陽光能源15倍都未到,大有追落後空間。

另一隻光伏股近月獲北水瘋狂追捧,就是北控清潔能源(1250)。自9月納入深港通以來,北水已累計淨買入17.76億股,佔已發行股本2.8%,成為該股第二大持份者。「隻股成190億市值,2.8%唔係好多啫!」戰友留意番,目前該股只有30.47%股份存放在CCASS,即係流通市值不足60億元。以北水平均持貨價0.23元計,意味過去2個月,北水在此股的總投資額已逾4億元,可見流入相當迅速。

北控潔能昨再挑戰0.3元大關,突破此關後,將上試0.35元水平,是短打的不錯選擇。

www.facebook.com/2012jason