【異動尋寶】希拉莉首戰小勝 What’s next?(魏力)
「世紀舌戰」首回合結束,從政經驗豐富的希拉莉,技術擊到「狂人」特朗普,賽後CNN進行的民調顯示,62%民眾覺得希拉莉贏,特朗普僅27%。睇落的確係壓倒性,但魏力會有個疑問:希拉莉作風四平八穩,對觀眾來講聽一次無問題,仲似乎幾有道理,但辯論有三個回合,究竟希拉莉可否每次都畀到觀眾新鮮感?無的話,優勢會慢慢靠向特朗普,就好似民調支持度一樣,因為佢言論出位,鬧人唔使本,咁大盤生意,選到證明自己價值,選唔到亦已連續見報幾個月,知名度火箭式上升,對日後生意亦有利,基本上nothing to lose。
至於市場則在逐步跟民調,price-in特朗普有可能勝選的因素,歐美股市都似在造頂,但price-in得越多,即使贏都可能反高潮炒上,未必是壞事,港股即使失守23000大關,以黃金比率去計,回調至22000至22500料已有頗大支持,故雖然短期易跌難升,但不用十分悲觀。
較大隻的黑天鵝反而在德銀,被美國司法部喪罰140億美元,總理默克爾仲話唔救,搞到德銀週一股價創新低。不少分析指默克爾老謀深算,此舉旨在「拋窒」對家,因為德銀係too big to fail,再講要救成本亦實在太高,不如出口術博美國司法部「手下留情」好了,但萬一美國揸正來做,德銀應會相當狼狽,搞不好更會火燒連環船,進而拖累股市向下走。
操作方面,短線仍以逢反彈減持為主,盡量輕身上路。真係賭癮大要搵股短炒,亦宜揀細市值股份,較不受市況影響之餘,亦有較大每日波幅可做短線操作,其中一隻為市值不足6億元的世界集團(713),業績連蝕3年,2015年虧損4,200萬元,今年中期仍輸1,400萬元,但股價近月卻離奇強勢,由7月份0.5元水平反覆上揚,本周二大成交破位,創去年大時代以來新高,可吼0.75元附近買入炒上落,或可極小注博賣盤。