【異動尋寶】龍門任你擺 股民散哂！（魏力）

近月港股當紅板塊逐個被阿爺政策擊倒，先用小朋友「近視」問題重擊手遊股，之後教育、醫療，甚至殯葬都要管，而且並非「小修小補」，而係「搬龍門、改賽例」，本來係避險勝地，一轉眼就變成當風位，食到應一應，早幾年大陸仲有句話「站在風口上，豬也能飛起來」，家陣可以變成「食正當風位，鷹都折翼難飛」。作為普羅投資者，不勝唏噓。

呢種市做散戶最好，清貨一了百了，專心逼車返工，閒來玩食雞煲延禧，做gym游水打波，距離個市越遠越好。可是，市場中一大班靠市開飯的炒家、基金經理，正逐步被「逼埋牆角」：重倉騰訊（700）、平保（2318）、吉利（175），先打三十大板；套現換馬去教育、醫療、殯儀股，諗住有「剛需」，無死喇掛！剛需係無錯，潛力亦巨大，但阿爺一聲令下改賽例，民企想暴利？No way！美其名是減輕普羅市民的生活成本，實際又是「國進民退」的又一體現。

之前有分析指，阿爺深知經濟放緩不可逆轉，惟有施展「組合拳」，連環攻擊「暴利」的行業民企，犧牲其利潤來降低通脹，以免滯脹一發不可收拾。然而，這卻是經濟市場化的一次重大倒退。

反觀貿易戰本身就是針對大陸市場化不足的弱點而來，如果進一步開放市場，外資大舉進入，企業服務、質素均遠勝內地同行（特別是國企），邊有得鬥？於是乎，阿爺唯有調轉頭搞民企，以鞏固國企的壟斷地位。作為投資者，去到呢個位，除了賭吓即市牛熊證，仲有咩辦法搵食？一個趕絕中長線投資者的股市，與賭場又有何分別？

筆者為證監會持牌人，未持有上述股份權益。
www.facebook.com/2012jason