香港股市 將收市,收市時間:4 小時 55 分鐘

【異動尋寶】 你撈得起嗎?(魏力)

無論是做直播節目,抑或個人專頁inbox,魏力昨日收到最多的問題,就是「撈得未?」同埋「撈邊隻?」魏力明白,「別人恐慌時我貪婪嘛!股神教嘅!」呢句話有無錯?yes and no。

這句話對的部份是運用逆向思維,因為股市是少數人贏多數人的地方,大部份人都掟貨,即係要沽都差唔多沽哂,咁樣就值博。但目前係咪「要沽都差唔多沽哂」呢?實在無從證實。魏力不才,從來個底都係事後先知,假如你好彩一撈就見底,絕對可喜可賀,但同時必須明白,這純屬運氣使然。

「唓炒股幾時都係靠運氣㗎啦!唔賭點知時運高?」之前教投資課堂,魏力劈頭就問學生:「你覺得你能否憑炒股一鋪發達,之後金盤洗手?」絕大部份都明白,係唔得,即係你唔係只賭一鋪,要係咁賭,賭好多年(而唔沒頂)先有機會達成呢個目標。問題就來了:假如只賭一鋪,即係賭大細,你贏面係50%,但當你係咁賭,次次都靠運氣,你認為可否一路「冧莊」贏落去?總有中伏之時,所以唔少戰友話炒股多年都係「和和果果」,呢頭贏完嗰頭又「奶嘢」,就是這個原因。

「咁點解股神可以貪婪,散戶又唔得?」這主要涉及注碼問題,也就是「別人恐慌時我貪婪」最常被理解錯的部份 。你有無股神咁「疊水」,撈來撈去都係面個浸?如果得一注去撈,萬一撈完再落,咁點算?這叫孤注一擲,逼自己去死角,十分不智。

舉個「泥足深陷」的例子:有位粉絲94蚊買完平保(2318),92蚊又溝,90蚊又再溝,三注錢幾日就用完,但仲未摸到個底,認真頭痕。唔係話返唔到家鄉,而係每日對住蟹貨的心理壓力(斬定守?),絕對不易handle,慘過被蟻咬。習慣上,魏力買完一注坐艇,就好少再溝了,會等到佢番上第一注水面再諗加注,起碼個勢對自己有利,而不是逆市而行。萬一唔對路跌穿圖表支持位,就算有能力再溝,也應該先止蝕離場觀望,等轉勢再上再買番。

無疑,這種操作是買不到最低位,但炒股都係為賺錢,個勢對自己有利,順勢而行贏面才會高,賺少一點絕對不是問題。始終炒股是一場馬拉松比賽。

筆者為證監會持牌人,持有平保財務權益,並可能隨時買入或沽出。

www.facebook.com/2012jason