【股壇衝鋒車】留意雷蛇影子股(周沖)
大市並沒有跟隨外圍破頂,反而在高位整固,執筆之時大市回落160點,周沖暫時認為不需要恐慌,始終重有2隻重磅新股—閱文同雷蛇排隊上市,大市抽資金去呢2隻新股也正常不過。
之前眾安(6060)上市前,大家就炒歐亞平有份的百仕達控股(1168)。咁雷蛇上市應該炒邊隻?有戰友話炒A8新媒體(800),但周沖就會建議可以炒下皇璽(8300)。可能大家會問,皇璽唔係做台灣牛肉麵或者度小月咩?點會同電競有關,答案就係一個月前的公告入面。
皇璽餐飲一個月前的公告就是與順康成立合營公司,以「PONG」品牌經營餐飲業務,但出左公告之後股價好似無咩太大反應。BEER PONG相信大家都唔會陌生,依家係香港大部分的BEER PONG電子檯都係沿用「PONG」研發的電子檯,以月費租用的形式作分成,留意番之前的報導好似係香港做得唔錯,配合番一向做開飲食的皇璽可以話強強聯手。
最重要一點係「PONG」其中一個大股東就係誠哥頭馬,長實執行董事、有「樓神」之稱的趙國雄之子趙朗(RONALD)。大家都知道點解雷蛇咁HIT都係因為誠哥有份投資,而誠哥頭馬個公子都係差不多時間拍埋上市公司合作,看來是想食正電競概念條水。睇番之前股價上到$0.165左近,而最近回落番去大炒之前,市值都未夠3億,現價入場風險唔大。重有就係去年配左手貨都要講緊$0.15以上,現水平比起配股價重要有1成折讓,只要公司一比炒鬼睇中,分分鐘炒高2-3成都不為過,算是一隻幾有趣的雷蛇影子股。
買入價: $0.13 目標價: $0.18 止損價: $0.11
chowchung123@yahoo.com.hk
http://www.facebook.com/chowchung123