【財叔小理】老師話…… (財叔)

【財叔小理】老師話…… (財叔)

上次講完點解要學好數學，跟住我就遇到一個網友放條小六數學題Facebook求救。

題目係︰孝忠把他所有波子的2/5送給小美後，餘下波子30粒。後來又送5粒給國森。

1. 孝忠原有波子多少粒？

B）孝忠送給小美的波子佔全部送出波子的幾分之幾？

我希望大家在睇落去前，都試下計個答案。當我以為呢條係一條好簡單小學數學題，發現原來超過七成留言朋友都計錯！我呢又多事又數學神上身人就梗係幫佢改正啦！

基本上我解釋完佢都明白點解錯，但其中有一個留言好有趣，佢竟然話︰「B題根本就唔使計，因為題目已經講係2/5。」更說︰「我覺得B題係寫錯個名（小美）。應該係孝忠送給國森的波子佔全部的幾份之幾？」而且竟然有人和應，我見佢應係解錯題，就溫馨提示題目無錯，叫佢留意題目係問「佔全部送出」而唔係「佔全部」幾分之幾。

有網友更把題中「佔全部送出」用紅筆圈比佢睇，但佢回覆係︰「餘下波子30粒（句號）『後來又送』，即是在『餘下的30粒減5粒』的意思，唔會影響總數。因為孝忠送兩次，俾兩個人，第一個人已經有份數，但第二個人無份數，佢先至叫你計。」

後來我話佢連題目都未識解，佢就叫朋友返去問老師，我話咁清楚重駛乜問老師？咁樣都要問，老師咪好唔得閒？佢就引用《孟子•盡心下》︰「盡信書，則不如無書。吾於武成，取二三策而已矣。」

嘩！嚇得我呀！原來佢中文強，但點解連中文題目都唔識解？最可悲唔係唔識，而係以為自己識，重唔肯聽人意見！跟住有網友回覆佢︰「盡信老師不如無老師！」更講出一個重點︰「向老師請教，係其中一種求證方法。鼓勵學生獨立思考，正正係要將權威既重要性降低。」

要獨立思考才會進步

唔知有幾多家長在教導孩子時，孩子跟你說「老師話……」呢？如果有咩問題都叫小朋友返去問老師，呢個「老師話」問題就更嚴重，以後就好難令小朋友對你信服。有睇開我文章朋友，應該記得《菱形不可有直角》，我唔係要挑戰老師，只係要令佢知道任何人講都要經過自己獨立思考，不能只求答案（就好似人買股票只係鐘意問巴），咁佢永遠都唔會進步！就好似現在坊間好多投資專家或聲稱財務自由人教人投資，我都唔可盡信。因為往往呃你人，就係你最信人，俾人呃唔緊要，最慘係俾人呃仲講多謝，咁先最恐怖！

最後，我發現個驚人大秘密，原來這位「中文強」網友係中學補習老師。就等如好多掛住財務自由旗號人教人財務自由，你話幾恐怖呢！基本上見到有人話教你「財務自由」或廣告中有這四個字，你都應該知發生咩事！

有時你以為好簡單，一個唔小心其實都可能會錯。記住投資同讀書一樣，無可以盡信，一定要靠自己小心求證，先可令自己進步，唔使下下問老師拎答案、問專家拎貼士。有重蠢到同專家合作，以為有好益佢。我真係要請佢去九記度食牛腩麵，等九哥贈返佢兩句︰「我做乜話你聽（投資心得）？你又唔係我亞二，係就送層樓比你！哈哈！」記住唔好隨便封人做偶像，由其係投資，因為一見到偶像好多人都會失去理智同分析能力！

作者：財叔

贏在起跑線，以同理心教導子女。大仔憑優異成績獲獎學金入讀港大，細女就讀官小五年級品學皆優，樂意分享自成一套的教育子女小道理。（本欄不定期刊出）