【財技開封府】供乾後有錢途 景福再賣成數高(包公)
創仔啤殻配售股氾濫,每隻一上市就mark上數十倍,係業績唔配合之下mark到過晒龍,市值達幾十億,當然不碰為炒。但係莊家睇準散戶愛撈底嘅心理,反正已經mark高幾十倍,沽得到都係贏爆,所以會向下掟,做大波幅引散戶接貨。另一方面,散戶只會見股價大跌,自以為股價會作出反彈,就會入場撈底,但係又唔留意大戶成本,所以越撈只會越低,到頭來輸錢之餘又輸埋機會成本,翻身機會都無埋,咁樣輸錢應真寃枉。所以,包公再講多次,炒呢類股,要清楚知道大戶成本先有至會有贏面,否則不如捐錢去慈善機構,或者買張六合彩仲黎得有意義。
今週大市「悶悶不落」,都係得番殼股可炒。包公最近發現左隻殼股景福(280)有異動,大家不妨留意下。
講番景福,其實曾經打算賣盤。早喺上年6月時,大股東楊志誠置業有限公司打算出售47.98%股市權,但係傾左8個月都無結果,喺今年2月9號就發出終上商談通告。而執行董事楊秉剛喺2個月後辭任,董事局中楊氏宗親會成員買少見少,似乎已經暗示只有賣盤的一條路可行。公司喺7月時進行供股集資計劃,包銷商係大股東楊志誠置業。細心睇下份通告,有兩個重點:
供股計劃以每5股供2股之比例,以每股供股股份0.6元發行2.6億股供股股份,供股之所得款項淨額估計約為1.51億港元。
集資目的係將所得款項淨額約35%用作優化資本架構,包括(但不限於)償還本集團之現有債務;及所得款項淨額約65%用作應付預期之額外營運資金需求,包括(但不限於)本集團若干零售店舖續租後所增加的租金。
其中第二點,集資目的係將資金用來減少現有債務,增加流動現金,但絕對唔係用來擴充公司現有業務,所以好大機會用來整靚盤數,事關輕債輕資產公司,更易轉手。根據截至2015年3月31日止之全年業績,公司流動負債加非流動負債約2億元,當中無抵押銀行貸款約1.4億,跟集資所得金額相約。
加上今次供股只有58.05%股權申請供股,超供的只有15.46%,餘下26.04%股權由包銷商亦即係大股東楊志誠置業接收。大股東楊志誠置業股權因而由47.98%進一步增加至60.7%,增加易手籌碼。一次供股就可執靚盤數再令大股東股權進一步鞏固,一矢雙鵰,可謂非常聰明。
大戶成本,即係供股價0.6元,執筆時0.75元,有2成幾溢價。雖然係咁,公司市值只係6.85億,但公司資產淨值達8.5億,唔計殻價,以公司已發行9.13億股計算,公司理論上值0.93元。如加上殼價6億元,則值1.59元。最近有隻賣盤殼股至卓國際(2323)傾完再傾,股價每每創新高,而景福亦曾嘗試過賣盤,唔排除今次執完後會再賣,值博率十足。
若大家想跟包公有財技交流, 請電郵至baokung888@gmail.com