【財技開封府】拆解供股蠱惑招（包公）

>

經歷過大時代後，有好多升左數倍嘅股仔逐漸回歸基本步。幕後無心維護股價之餘，實行有貨就掟。無他嘅，雖然股價差不多打回原形，但就算以現價沽出，回報都豐厚。有部分更開始供股，來一招清洗大平地，洗走瘀血，喺一年之內完成向上炒完及向下炒，手法令人嘆為觀止。手上有貨嘅小股東最為被動，一係跟牌，一係投降，要知道供股都會有一線生機，但係如果小股民睇唔清幕後目的，不如忍痛離場，總比投入新資金來得精明。

 

>

包公今週會講下隆成集團（1225）同中國投融資（1226）呢對供股孖寶，拆解背後供股招數。

 

>

隆成集團主業係產銷嬰幼兒產品，以嬰兒車及汽車坐椅為主。喺上年，公司就以9.3億元作價，出售本業予加拿大Dorel，而公司就轉為生產醫療產品。交易完成後，隆成集團每股現金值1.39元，及派特別息0.3元，David  Webb喺當時更認為派息過少，曾呼籲小股東投反對票，不過一切已成定局。雖然公司完成出售後成為淨現金殻股，但股價竟然不斷向下尋底，現時市值只有2.38億，相對資產淨值13.7億，折讓達8成之巨。公司最近以一股供三股每股作價0.15元之供股計劃，集資4.2億，其中以2.7億元收購貝格隆證券（前稱炎昌証券），以及以1.17億元用來透過Black Marble Capital於香港經營放貸業務。

 

>

公司有足夠現金唔用，但又以供股集資買入業務，牌面上來睇係新殻主以供股手法攤薄舊股東，而持有8%股權嘅David Webb 相信係目標之一。是次供股不設超供，即係小股東唔跟供，最後包銷商會接晒供股權，最多達75%股權，而現時主要股東黃英源及陳俊傑股權則分別由15.9%及10.19%攤薄至3.86%及2.48%。翻睇管理層變動，上年有幾位新人進入董事局，而兩位麥光耀及黎健聰有財技人嘅影子，而麥光耀更係現係任康宏金融(1019)董事，加上其中一個大倉放喺康宏，而且公司轉型搞醫療業務，此等變動令公司染有某華資系財技股嘅色彩。

 

>

另一隻中國投融資(1226)，其實跟隆成有莫大關係。今年3月31日，中國投融資以0.5元之作價購入隆成7600萬新發行股份，佔已發行股本約8.59%，涉及款項3900萬元。而隆成又喺兩個月後，即5月21日，以3575萬元購入中國投融資1.3億新股，每股作價0.273元，佔已發行股本約12.44%，其後再喺市場減持至9.89%。就咁睇，兩間公司基本上唔需要付出大量資金，以4000萬左右一來一回，就已經完成控制兩間公司約10%股權，幕後財技功力相當高。

 

>

中國投融資最近先以五股合一股再以每股0.25元作價一股供八股供股集資，集資4.18億。其中公司通告中列明集資所得嘅1.12億用作集資活動，相信當中約3400萬喺用作隆成供股之用。供股包銷商正正是隆成準備收購嘅貝格隆證券。是次供股亦係唔接受超供，包銷商要貨意願非常明顯。假如無任何股東供股，包銷商會接收88.8%，不過以現時股東結構來睇，今年才入股中國投融資嘅隆成以及君陽太陽能(397)相信會接受供股，兩間公司分別持有9.89%以及6.34%股權，所以包銷商最多只能獲得72.66%股權。以此計算，最終結果相信係貝格隆以3.36億元左右買入72.66%股權後，成為單一大股東，及後隆成以2.7億買入貝格隆，從中變相間接持有4億資產，即隆成注入資產之餘，順道免費一家投資公司（21章公司）。所以兩單交易變相以一筆錢收購兩隻殼，對隆成來講絕對是一矢雙鵰。

 

>

不過包公認為隆成有現金唔用，反而供股集資，完全漠視小股東利益。呢種舉動一旦出現，日後難保會作出類似嘅財技動作，對小股東來講非常不公平。包公認為此股向下炒風險不少，絕對供唔過。另外中國投融資作出大比例供股，對小股東不利，而公司7月公布嘅每股股份之未經審核綜合資產淨值約0.76元，跟現價0.095相比達9成折讓。包公認為好嘅公司唔應該有咁大資產折讓，除非箇中有不為人知嘅原因，正正係小股民不明就裡，加上公司財投操作過於精細純熟，所以包公認為小股民不應沾手呢兩隻供股孖寶。如果對股市有信心，把錢投入盈富基金（2800）會是更好嘅選擇。