香港股市 將在 8 小時 21 分鐘 開市

【銀行小妹甩轆記】查無此人 (溫柔)

有日,一如以往我要接Walk-in客人查詢戶口情況。「小姐,你好,有咩幫到你?」

「啊,你幫我查我戶口紀錄。」

「哦, 麻煩小姐提供返身份證。」

然後,客人就好配合咁遞張身份證畀我。基本上,只要在電腦輸入佢身份證號碼,系統就會查到戶口紀錄。但……咦?點解冇?!

怪異事情發生!因為竟然無呢個人紀錄!明明就算取消過戶口,都會有紀錄㗎!

初時我以為打錯身份證號碼,但重入幾次都係無紀錄……

我偷偷底望幾眼,確定佢有腳之後,就問:「唔好意思,想問一下,你係咪之前無開過戶口?因為系統搵唔到你紀錄。」

客人本身已經等到好唔耐煩,一聽到無紀錄,更加係把鬼火:「我幾年前開㗎啦!間唔時會用,係就係少用,但你銀行點做㗎?!唔用一排就幫連我戶口都取消埋……(下刪一千字)」

我心諗:唔通真係系統有問題?但又唔太可能啊……

於是,我戰戰兢兢再問:「唔好意思,真係無你紀錄喎,不如你再諗清楚?記唔記得幾時開㗎?對上次用係幾時?」

客人反一反白眼,好囂張咁答:「唔駛諗喇!我仲有你張提款卡!點會有錯?!」

佢邊講邊由銀包張提款卡出,然後大大力拍落俾我睇「睇真!無花無假!」

白撞顧客 無理取鬧

我望望張卡,差「咭」一聲笑出。無錯!張提款卡的確如假包換,但真相只有一個——張提款卡屬於另一間銀行!

無奈之下,為免傷害到佢弱小心靈,我決定細細聲話佢知:「呃……呢張好似係B銀行卡,而我係A銀行……」

佢嚇到呆一呆,回過神後就大大聲鬧:「!乜原來你係A銀行!做咩唔寫清楚?!你又唔一早同我講?嘥晒我時間!」然後邊鬧邊逃走。

唉,一定又係我錯啦……

作者:溫柔

一個90後銀行跑數妹,分享每日於分行上演的奇趣事,著有《銀行小妹甩轆記》。(本欄隔周刊出)