【魚樂無窮】四叔的致富之道（唐牛）

人稱四叔的恒地（012）主席李兆基，宣佈擬於今年周年股東大會後退下火線，由兩位公子接棒，恒基系王國有幾巴閉，相信唔使多講，大家都十分清楚，今日想講下四叔其中一個投資哲學。

用Google搜尋「李兆基網頁」，你會搵到四叔嘅個人website，網頁其中一欄標題為《青年人成功致富之道》，然後會發現一條發達方程式︰

「要有第一桶金，以錢賺錢

例如由二十歲起，以一萬元本金計算，每月有2%利潤，每年息疊息計，五十年後，就會變成四億六千八百萬元，所以先要有「本」最重要。」

講到呢度，相信你會即刻反駁，「1個月有2%利潤，即1年回報率27%，邊有咁筍呀？」如果你用舊年股市表現量度，實在非常之難，但回想2015年、2017年甚至今年，炒股票贏錢其實唔難，尤其係2015年大時代瘋炒，能夠全身而退、全年回報以倍計的大有人在。

反而重點在於，本少要double回報唔難，例如你用1萬蚊博超貼價牛熊，好彩的話唔使幾分鐘已贏一倍，但當身家升至七位數、八位數時，根本冇可能再all in去博，一來你會怕輸，二來市場深度不足，唔容許你咁做。拎10萬贏到另一個10萬嘛，對你整個倉位來說，卻又是微不足道；是故要令身家再進一步，不能單靠股票，亦不難發現有錢人持有最多的資產，會是磚頭和債券。

說到尾，用1萬元變5億元，其實屬於理論層面，真正的意義在於，大家要透過投資增值，懂得用錢搵錢，四叔呢個致富之道，一生受用。

唐牛fb專頁

http://www.fb.com/tongcow88