【魚樂無窮】賭美團跌到反艇（唐牛）

港交所（388）行政總裁李小加發表網誌，為新經濟股跌穿招股價護航，指新股破發與上市公司質地優劣並無必然關係，IPO發行價只是參照市況訂立。小加總裁說話不無道理，但如果有股民以110蚊買入閱文（772），或者10蚊搶入易鑫（2858），這番話卻是冷血兼冇人情味。如果我係佢的話，我會加多句，股票市場可以造好，也可以造淡，跌市一樣可以贏錢。

有跟進本欄的戰友都知道，唐牛甚少染指衍生工具，但賭跌市除了沽空，只能開put買熊。為了食盡跌浪，我最近也學人開put，不過不是賭指數，而是落注越跌越有的巨無霸新股美團點評（3690），業績差到冇朋友，市值卻依然高達2,500億元，小米（1810）業績有改善都抵受不住地心吸力，美團點評業績轉差，下跌空間肯定無極限，大家有興趣不妨跟進。

近日發現唔少上市公司宣佈換核數師，有趣的是，原因是傾唔啱核數費用，似乎搵食甚為艱難，上市公司荷包緊張，核數師大把人要養，亦唔可以收得平，否則只會做爛市，結果會否做成劣幣驅逐良幣，降低上市公司質素？大家不妨抄低近日換核數師公司的冧巴，看看未來會否出事，如果好嘅唔靈醜嘅靈，記住一籃子blacklist了。

唐牛fb專頁

http://www.fb.com/tongcow88