【世道艱難】女部長求食客處理嚎哭小孩 慘被抨擊

今時今日，飲食業嘅待客之道已經掀起革命性嘅變化。某些出名茶記食肆，員工仲惡過食客，食客聲都唔敢出，反觀另一啲連鎖食肆，員工基本上做乜都係錯，食客仲惡過你老闆。

日前喺親子討論區，就有家長大鬧將軍澳新都城某連鎖壽司店，原因就係自己個小朋友大喊，但女部長唔體諒不特止，仲叫個家長控制一下小朋友，因為咁樣會影響其他食客。

就係「控制」呢個term，激嬲玻璃心家長。「話我控制唔到小朋友，不如話唔招待喊嘅小朋友！」之後就開始網上呼籲其他家長唔好幫襯。

但似乎呢個post得唔到網民嘅支持，有網民舉例有好多高級食肆唔招待小朋友，因為真係擔心佢哋會影響其他食客。

亦有人建議家長應該想辦法氹小朋友，而唔係由得佢喊。 至於部長面對呢類家長客，亦要留意用字、小心睇路，否則好易被群起攻之。試過有食肆員工叫等位嘅家長等個bb喊完先入去，又係一秒激嬲家長。

所以話今時今日食肆唔易做呀，BB客仲難湊過老闆！ 下次小心中地雷，唔好再講「控制」啦～～

來源： Baby Kingdom

===================

19網輕鬆爆料熱線，歡迎舉報老細同事19惡行，立即click入去講畀我哋知啦