古天樂至今唯一承認的女友 43歲黃𨥈瑩保養得宜投身美容界

入行多年嘅古天樂（古仔）成為首位歌影視大滿貫藝人，但至今仍然單身，多年嚟與唔少女星傳過緋聞，當中包括楊千嬅、陳妍希、郭采潔、唐詩詠、鄭秀文及楊恭如等等，但佢唯一公開承認女友身份嘅就只有黃𨥈瑩。

黃𨥈瑩1994年參選香港小姐，比賽中獲得最上鏡小姐，當選後選擇退學並簽約TVB。出道時被TVB力捧並演出多個主要劇集，後期更有份參與多個主持節目，可以話有好多演出嘅機會。1995年因拍劇《餐餐有宋家》而認識古仔，之後日久生情而相戀。1996年更於劇集《河東獅吼》飾演嬌俏可愛嘅蘇小妹，更憑住可愛嘅性格開始被受關注。

二人於01年分手，雖然愛情終結，但有指古仔係一個有情有義嘅人。古仔同黃𨥈瑩拍拖期間，因爆出年少時曾犯事醜聞而令古仔工作量大減，但當時身為女朋友嘅黃𨥈瑩唔單止冇半句怨言，仲默默留喺古仔身邊支持佢，令到古仔大受感動！古仔曾經講過黃𨥈瑩喺佢最失信心嘅時候安慰同幫助佢，所以承諾呢一世都唔會俾人傷害佢。

咁黃𨥈瑩淡出娛樂圈之後生活係點呢？有指黃𨥈瑩已經投身美容業工作，唔怪之得近呢幾年雖然少亮相，但佢都有更新自己嘅社交網站，相中依然Keep住靚，真係Keep得好好！