吳若希被冷落寸老公：打飛機都話嘥時間

吳若希

正在家居自我隔離的吳若希，適逢新歌推出，她開Live玩倒數，殊不知卻變成「聲討」大會！她疑不滿老公掛住打遊戲機被無視，公然爆大鑊報仇，指老公覺得「打飛機」嘥時間，一番豪語嚇窒全場！

吳若希（Jinny）夫婦一向糖黐豆，趁新歌《這位蠢才》兼MV出街，前晚她與老公Alex孖住開Live放閃光彈，甫開始見Jinny猛影住打機中的Alex，即使她嗌餓又取笑老公髮線上移，但其地位似乎比遊戲機低。轉移視線不果的Jinny，只好找好友解悶，先邀請林盛斌（Bob）加入直播，期間向來敢言的Jinny突然當住1,500多名觀眾前大爆老公秘密，玩攻擊「洩憤」：「佢係一個唔打飛機嘅人，話好嘥時間，其實（打飛機）可能係講緊5至10分鐘，對比起打機2、3個鐘，佢話打機唔嘥時間，唔係好明佢對時間投入嘅觀念，係我有問題定點？」搞到Alex尷尬到爆，但亦不發一言繼續打機，毫無反擊意思，果然是「愛妻號」！

惹未成年粉絲提問

面對「問題少女」，Bob一臉錯愕後爆笑問：「你癲咗呀？定飲醉咗？叫我點答你？每個人都唔同嘅，咪畀佢打陣機開心吓！」連Fans亦笑指「我究竟聽咗啲咩？」、「黐線o架，哈哈！」、「未夠18歲呀姐姐」，Jinny見有未成年觀眾發言，即大笑「趕客」，並補充：「打飛機對男仔嚟講係好正常會做嘅嘢，唔好太神化，只係喺華人社會少開口講，對小朋友係性教育。」但仍壓制不住觀眾發炮式留言。