雅虎香港財經 嘈老闆IG｜共同富裕係咪第三次分配｜曹參國
自從內地提出共同富裕呢個概念，同中國經濟息息相關嘅中環圈子都成日問，究竟共同富裕係搞乜東東？當然最極端嘅預測就係話會用返社會主義運作，早排有傳內地因為疫情分配物資再搞「供銷社」，即刻有人唯恐天下不亂，話內地嘅超市將會冇運行。
查實自從改革開放40年嚟，內地民眾都慣晒市場運作嘅方式，又邊有可能放棄琳琅滿目嘅超級市場，供銷社只不過係處理疫情嘅臨時安排。當然再宏觀啲睇共同富裕，會唔會真係社會主義分配方法，智庫一國兩制青年論壇何建宗博士就喺報紙寫咗篇文章解釋共同富裕，只不過係第三次分配，詳情可以喺信報度自己搵嚟睇。
簡單嚟講，市場分配就係第一次分配，即係你打工就有人工收啦。但係因為第一次分配有時都會處理唔到公眾問題，就出現第二次分配，即係政府收稅再提供公共服務，咁先至有人修橋補路。第三次分配就係慈善機構同民間組織，出錢出力填補社會特殊需要。
但而家睇共同富裕係咪就等於第三次分配呢？好似最近京東（9618）劉強東就宣佈2,000名高層人員減薪一成到兩成，但係就撥100億畀基層員工買樓，又幫補佢哋嘅仔女讀書開支。呢種唔係要求政府立法強制進行，又唔算完全係企業自己嘅人事管理，但係又做到解決弱勢社群問題，呢種模式可以話係中國獨有嘅混合式分配。騰訊（700）就好早已經講咗會準備1,000億去搞共同富裕，最近以股代息都係為咗準備呢筆錢。
有時候有啲理論框架，只不過係總結已經發生咗嘅現象，對於新發生嘅事情未必能夠完全適合解釋，好似中國式現代化就根本在世界上冇其他先例。共同富裕如果搞得成功，都可能係另一個全新嘅概念。
香港奉行資本主義咁多年，都靠好多慈善力量去幫唔同嘅時代需要。我曹老闆上個禮拜就再次參加咗香港家庭教育學院嘅慈善籌款晚會，其實佢哋好多年都支持家庭教育，就算喺疫情都用網絡支援唔少家庭。嗰晚佢哋就更加喺古蹟西港城舉行晚會，呢個愛德華式嘅建築原本喺上環街市，後來就將花布街嘅檔戶搬遷上去，而家佢哋仲搞緊啲關於寵物嘅小型展覽，無論係古蹟保育定係推廣教育，香港都真係有好多實踐經驗證明第三次分配嘅威力，唔知內地會唔會參考呢？
密切留意BossMind動向！立即CLS
Powered by Mercury
