嘈老闆IG|旅遊業救唔救到香港經濟?|曹參國
通關復常之後完全冇之前預計嘅效果,雖然世界各地同內地嘅遊客開始返返嚟,但係無論佢哋嘅消費力,定係旅遊嘅習慣都完全因為疫情改變晒,人數少咗都係其次,慳住個荷包嚟旅遊,呢個先係致命傷。但係其實旅遊業又係咪真係可以拯救到成個香港嘅經濟呢?
2023年旅遊業增加值儘管按年急增13倍達到1,650億元水平,但都佔GDP比重僅僅5.5%。金融同貿易各自都佔成20%,好明顯有重大嘅差距。如果講政府嘅政策對於唔同範疇嘅影響力,反而金融同貿易嘅影響力往往係立竿見影,而要推動旅遊業就只係蜻蜓點水。
由今年開始搞嘅盛大活動,唔係話冇效益,而係有啲本來就搞開,有啲新搞作洗咗公家資源又好難計算個成效,最理想當然係政府部門只係拆牆鬆綁,俾返市場去主導呢啲盛事活動。
澳門嘅情況仲慘過香港,雖然有內地人對旅遊嘅排名城市,喺疫情前香港係曾經排第一,而家係排第七,輸埋俾澳門。但係呢啲排名唔係玩骰盅一鋪大細,旅遊業係講細水長流,除咗城市本身嘅魅力,每一個市民對於遊客嘅態度都好重要,旅遊發展局而家搞緊嘅好客運動,每人行多一步,方向都係好正確。
好多人唔明白澳門賭場嘅業績開始恢復,點解股價都係窒住窒住?雖然賭牌續期嘅不明朗因素已經冇晒,但係新牌照對於貴賓廳嘅運作基本上禁止,過去存錢喺貴賓廳嘅豪客,亦都冇咁容易會返返嚟。我曹老闆假期去過澳門嘅賭場行吓就睇到人流仲多過蘭桂坊,但係中場客點樣賭法都唔夠貴賓廳一兩口。
同內地嘅經濟疲弱一樣,我哋對於應對疫情係用全世界最嚴格嘅方法,呢個係要有成本歸還嘅。澳門每一間賭場喺疫情期間都虧蝕咗一兩百億,而家就算一年賺返十幾廿億,隨時呢個賭牌嘅年期完結都未能夠回返本。夏寶龍主任上月去澳門停留咗七日,上次嚟香港之後返去都會有一啲措施針對恢復經濟,睇嚟澳門都等緊呢啲強心針。
去到澳門當然要食吓好嘢,今次介紹水平一直都好高嘅永利酒店京花軒,推薦京蔥羊肉同埋大袍紅乳鴿,京蔥羊肉做到口感軟滑,而大袍紅乳鴿外脆內軟,除咗有茶葉嘅香味,仲用咗好多椒麻紅焗出特別嘅香味,呢種煮法可以話係我喺廣州花園酒店食過香茅乳鴿之外,排名第二嘅獨特煮法。提下大家佢哋而家只係做晚市,平日仲有一日係休息嘅,去之前要問清楚,但係咁樣又係另一面反映澳門嘅經濟真係麻麻。
曹參國
註:專欄作家言論不代表本網立場