雅虎香港財經 嘈老闆IG｜開放市場咪唔會有壟斷｜曹參國
曹老闆同班老外喺半山區嘅LRC食晚飯，喺半山睇住香港嘅夜景，做吓運動跟住嘆正宗西餐，個南瓜湯同埋蟹肉沙律真係頂呱呱，主菜三文魚就一流水準，煎得剛剛好，咁嘅生活質素真係世界上都唔係好多地方有。但係班老外朋友仲係好擔心香港嘅前途，係咁問我究竟值唔值得繼續留喺度發展，我哋其中傾到嘅係競爭委員會話地產代理兩大龍頭有合謀定價，老外喺外邊見慣風浪，對於呢啲干預市場嘅行為梗係特別敏感。
其實過去成日話有壟斷嘅嘢都係政府自己搞出嚟，好似房屋署以前話啲鐵閘喺新屋入伙嘅時候俾啲公司合謀定價，搞到基層公屋住戶上樓變咗要俾貴錢。但其實呢啲都係房屋署承判商名單封閉嘅結果，開放個名單比合資格嘅人競爭做鐵閘又點會可以壟斷到呢？
講返香港一手樓係咪真係有地產代理可以壟斷，仲可以合謀佣金。咁就要先講吓一手樓同二手樓究竟係咪同一個市場，買樓嘅人唔鍾意買一手樓，嫌地產代理嘅佣金貴，咪去買二手樓囉，咁多細細間同中型嘅地產代理，兩大集團想壟斷都幾難啦。
跟住又傾到呢排新聞講油塘嗰幾間水泥廠話想搬遷又冇地方，其實油塘本來就係工業區，人哋先用盡個地理位置嚟設置水泥廠，水泥又要兩個鐘之內送到去地盤，成個九龍同埋港島東嘅發展都係靠晒油塘呢幾間水泥廠貢獻左幾十年。而家政府要油塘賣地起住宅收錢俾庫房，又點可以唔照顧吓運作咗幾十年嘅呢啲老牌水泥廠呢？
水泥係城市發展必須要嘅建築原材料，如果政府唔想有大企業壟斷，就更加要讓行業百花齊放，最好嘅做法就係安排佢哋暫時去一啲偏遠啲嘅地方重置水泥廠，好似有排都未發展到嘅將軍澳137區，起多兩間，唯有競爭唔怕會壟斷囉。唔止水泥成本可以下降，政府每年買水泥嘅錢隨時都可以慳到，重新起過水泥廠仲可以要求提升環保嘅水平，咁唔係雙贏嘅方案咩。有時我哋真係唔係好明特區嘅官員係想製造壟斷定係想社會發展暢順，老外就係怕呢d官僚心態會出事。
曹參國
註：專欄作家言論不代表本網立場
