雅虎香港財經 嘈老闆IG｜點解飛機鵝可以聞名遐邇｜曹參國
中環鏞記嘅燒鵝，世界馳名，所以出名有一種食法，係「飛機鵝」，即係要搭飛機嘅人上機前去鏞記點一隻燒鵝外賣，跟手拎上飛機慢慢嘆。當年係冇咁多外賣工具，但係鏞記就做到細心同埋有遠見，連個包裝保溫都諗得好細心，呢啲就係做生意成功嘅要素。
特首上個月帶團去中東訪問，仲簽咗好多協議幫香港同中東做更多生意。但其實有香港企業一早就走去中東搵商業機會，仲做得有聲有色。好似長和系就係其中嘅表表者，和記港口嘅董事總經理仲有參與特首中東訪問團，實有好多實戰經驗，可以喺團裏面分享。
話說長和喺20年前已經喺中東經營港口業務，而家喺中東五個唔同國家有9個港口，總共營運19個泊位，一直都將中東作為非常重要嘅市場。話晒中東地區三個主要國家，沙地阿拉伯、卡塔爾同阿聯酋，總共有超過4,800萬人口，點唔會發展潛力龐大啊！
長和另一個業務屈臣氏大家都幫襯過，去到東南亞唔少國家都仍然會見到佢哋嘅招牌，原來中東都已經一早插旗。而家屈臣氏喺中東已經有17家分店，個網絡仲不斷擴充緊。雖然17間唔算係好多嘅數目，因為屈臣氏先啱啱慶祝佢哋第1,000間菲律賓分店開張，按呢個目標嚟睇，中東有好大嘅發展空間，由17間到1,000間都未必要好長嘅時間。尤其屈臣氏喺內地有成3,900間分店，就算疫情期間封區封城，業績都唔算好差，而家通關復常就更加唔使講，人人都注重健康，買健康產品嘢都買多啲。
所以呢做生意真係要講夠細心同埋長遠視野，朋友又請我嘈老闆去鏞記食燒鵝，燒鵝嘅甘香真係冇第二間比得到，金漆招牌仍然省靚，花膠竹笙湯鮮甜，頭盤隻皮蛋糖心出色，我都希望鏞記燒鵝開到好似屈臣氏咁，第時去到中東都有得嘆燒鵝。
曹參國
註：專欄作家言論不代表本網立場
