香港股市 將收市,收市時間:3 小時 20 分鐘

地產代理難過的一個聖誕

市場對地產代理嘅負面新聞實在太多,單單新聞日日話自己飯碗爆煲,一諗就知唔好受。

業界本身亦不乏負面新聞,回佣、截車搶單、街霸等等,本來專業化之後,早已由「經紀」變成「代理」,但近年又要重回「經紀」形象,好多人眼中,賣樓就係打爛仔交。

同地產朋友傾開,佢話今個聖誕呢行好難捱,有指標屋苑嘅門市近日關門大吉,明年市況又未見轉機:「你哋傳媒日日吹奏,想好都難啦。」加上近日施永青一句:「佢話只有無料到嘅經紀先會以減佣或回佣促成交易…無人想無料到啩?」聽後筆者一臉尷尬。

講起施永青,幫佢打工嘅人一定難忘樓市暢旺過聖誕(好似係2007年),中原地產搞聖誕聯歡會,食物加碼之餘,抽獎禮物又手機又I-pod又現金獎,豐盛到上埋報紙新聞,當年有記者仲統計埋食物同比增長50%;今年聖誕,業界應該連聯歡都無心情?

網民發起向施永青送聖誕卡運動

不過聖誕節又唔一定要慶祝同消費,事實上施永青自己就係從來都唔慶祝聖誕節的,點解?因為施永青7歲從上海來香港生活,當時家境並不富裕,難以準備聖誕禮物,有次將同學送的聖誕卡轉送其他同學卻被揭發,結果被人唱通街,自此之後施永青對聖誕節印象不好,變成從不慶祝這個節日。

不慶祝、低欲望、不消費,其實都慳返唔少,一眾地產從業員不妨學學施永青,對聖誕沒有欲望,就沒有所謂難過了。

呢幾日有網民發起向施永青送聖誕卡運動,其中有網民話施永青「無舊時嘅陰影,邊有今日嘅成功」,呢個真,無論有幾難過,有危必有機,捱過就是了。

===============

財經精選資訊網站「中環街市」  臉書粉絲頁