外國調查:84%打工仔唔信高層
人在職場,若然有個可以信任嘅人一齊拍住上,做事應該更順暢。可是,人心隔肚皮,萬一信錯人,就真係攞苦嚟辛。早前有外國調查指,95%嘅受訪高級管理層深信員工會很信任自己;但實情係,在2000位受訪英國打工仔女中,僅得16%稱信任公司高層,有84%人,預高層會講大話。
據英國Virtual College嘅調查顯示,逾半(57%)受訪打工仔女稱,喺公司入面最信任嘅人係同事;其次為主管(45%)及同Team嘅人(42%),最後才到一眾高層(16%)。
高層會講乜大話?不外乎「明年就升到你」、「今年公司生意唔好」、「經濟環境差」、「你好幫得手」等等。
信任要靠相處時間去建立,不過身為公司小薯,試問邊有機會見到高層呢?講到對公司高層信任度最低嘅行業,便是公用事業(3%)、法律界(8%)及政府服務(8.7%)。
此外,有44%受訪打工仔女認為,提升佢哋對職場嘅信任度,有助增加工作幸福感;同時最多人認為「改善溝通方式」(52%)和「定期開更新會議」(40%),係提升員工職場信任度嘅最佳方法。
但話說回頭,若高層們真係肯咁做,又有幾多員工夠膽講真話呢?真心好,假意都好,高高在上嘅高層們也該偶爾「下凡」,了解一下低層員工嘅苦況,避免下達唔合理嘅工作指令,才能叫員工做事更有效率,更加投入。當然,如果係人工和獎金「加碼」嘅實際行動,就更開心啦。
===================
19網輕鬆爆料熱線,歡迎舉報老細同事19惡行,立即click入去講畀我哋知啦