雅虎香港財經 大茶飯│沽iBond也有學問（青冰）
新一年度的iBond在星期五截止認購，翻查記錄，今次已經是第八次發行，首次發行時有100億元，那次只得十六萬人申請，認購額只得131億元，即係輕微超購0.3倍，換言之係你認購幾多派幾多，青冰有財資界的朋友在首年就發了這個財，因為首年老散們唔識玩嘛，唔知道係政府變相派錢，所以隨後的發行，大家都變得醒目了，點都伸手去拎返啲，去年有46萬人申請，發行額150億元，大致分到3至4手。
美股、外匯、加密貨幣免費即時報價，自選投資組合獲取相關新聞提示。
iBond的玩法跟IPO新股完全不同，認購策略要睇孖唔孖，A組定B組，超購幾多倍，超購回撥有幾多，才勉強預計到自己會中幾多股。iBond就十分簡單，順住人頭派，今次發行額是150億至200億元，如跟去年一樣有46萬人申請，瓜分200億元，每人平均有4手，由於不是每位申請者都會申請多於4手嘅，所以今次應是坐五望六，即使戰友錢多無地方使，都不要去申請十幾手呀。
新股炒唔炒要睇供求，iBond就有保證每年派息2%，若果略懂時間值的計算，就會計到所謂的理論價，跟去年一樣，都係104蚊樓上，若你假設通脹上升至某某水平，隻iBond就可高見幾多幾多，這是後話，但不需要將簡單複雜化啦，大家都係想袋袋平安就算，不過這個理論價並不會上市首日就到價的，話說去年青冰叫財資計朋友幫手計過理論價，但暗盤及上市首日都係有人不問價咁掟的，青冰為了證實朋友無計錯，仲103蚊樓下去接飛刀，結果上市後一個月才升破104蚊，這並不是甚麼通脹預期升溫，只係機構投資者明知散戶會亂沽，怎會頭幾日就掃上理論價呢，咪慢慢收集囉。不過又咁講，由於大家獲分派的手數都不會太多，相距一兩蚊都是只有限數。
銀行證券行平台各異
銀行及證券行都各出奇謀，引大家去申請，但留意返在銀行申請，要沽出時或會是以場外交易形式沽出，即係話你係沽畀銀行，不是你在港交所見到那個價，銀行個價就一定差過港交所的價，上市初段仲會差幾遠，原因就係散戶唔會理咩價都沽，咁佢何必開咁靚價畀你呢，你亦可去銀行辦個手續，係可以轉去股票倉，再在港交所沽，但你就要自己計下手續費同煩唔煩，怕煩不如就場外沽，亦因為咁，銀行更加唔會開個靚價畀一些嫌麻煩的散戶啦，係咪？
青冰
http://www.fb.com/chingbing888
本欄逢周二刊出
