雅虎香港財經 【大茶飯】市場恐慌 只信美債（青冰）
甚麼叫恐慌性拋售，相信戰友們上星期應該體驗得到，以全球最強的股市美股來講，幾年以來都未見過咁深的回吐，難怪侵侵這幾天都唔敢出聲，上年出一個tweet跌一千點，都仲可以再出口救返，今次應該諗唔到對白喇。
道指以上周五的低位計，5日跌咗14.9%，青冰即時搵返以往的股災，2018年XIV爆煲，道指幾日內跌一成，相比之下上周的確係勁，再數遠啲，2008年9月雷曼爆煲後，4日跌8.4%，戲肉在10月，由出事至10月低位，道指跌了31%，再數上去便是911事件及87年股災，姑且唔講咁遠，就以時間及幅度計，今次肯定是近年最慘烈的。不過雖則係慘烈，但相對於之前的災，今次只係跌返去6月時的水平，仲未係52周新低，原因就是，美股真係升咗好耐喇，回一成半還未傷到元氣。
另一個量度恐慌氣氛的，是VIX指數，最近5年有三次是升至約50點水平，2015年8月高見53.29，2018年2月高見50.30，而上周五最高是49.48，而這三次不約而同，VIX都在當天收市前大幅回落，睇圖就可以話出了一支長針，2015年及2018年那兩次都是見底訊號，而對上一次VIX指數升逾50點都仲要再上的，便是2008年雷曼，所以今次係瘟疫打殘全球見蕭條，還是虛驚完再上，睇多一、兩星期便知，青冰暫時傾向是相信VIX的長針，但都要做好隨時着草的準備。
資金避險 10年期債息新低
除了看股票指數，債息都反映了恐慌情緒，2年期債息5日內由1.39厘跌至周一亞洲時段的低位0.74厘，10年債息就由1.52厘跌至1.03厘，可能戰友對債息水平不太敏感，但提返你10年債息是紀錄新低，由此可見市場資金係瘋狂沽股買債避險（債價升息跌嘛）。至於另一避險黃金，雖然在上周一創6年高位1,689美元，但在美股跌得最甘的幾天，都冇再上，在上周五更加急跌至1,563美元，2月的升幅全部報銷，由此可見，去到最極端恐慌的時間，資金最信得過的只有美債。
債息新低最當災的是金融股，試想想10年債息都係得一厘時，存戶最多畀零息啫，息差咁窄仲有利可圖嗎？所以如這情況持續，要博反彈的，無論是美股還是港股，應當先避開金融股。
青冰
本欄逢周二刊出
