【大茶飯】摩指與富時換馬的機遇（青冰）

每年的2月、5月、8月及11月，都是幾大指數公佈季檢的月份。

每年的2月、5月、8月及11月，都是幾大指數公佈季檢的月份，恒指當然是最多人留意，藍籌新貴，北水新歡，都很多人睇實，但若說所帶動的資金流，MSCI及富時指數應遠勝恒指，不過大部分投資者都係睇新聞而知結果，有時難免有點沙石，尤其是MSCI，點解青冰咁講呢，全因他們的表達方式引起。

MSCI的新聞，較富時指數多人報道，可能是傳媒的習慣吧，富時在上周五公佈的季檢結果，好像就較少人提及，而MSCI在兩星期前公佈的結果，就明顯較多人報道，不過當中大部分都搬字過紙，沒深入研究當中的進出。MSCI的指數季檢，是會分大型股、小型股及微型股三份公告的，表列了全球指數在今次季檢的增刪股份，有趣的是，有不少股份看似新加入，其實是離開了小型股指數而加入大型股指數，即係升咗班，當然有升就有降，你見這公司被踢走，很可能只係加入了另一個不同市值指數而已。

泰格思摩爾雙重升呢

至於點解咁執着於全新加入呢？咁就要問返自己，點解要睇這些季檢啊，就係想追蹤指數的被動基金，帶大家搭一轉順風車嘛，所以資金流對全新加入的，應該比升班股票，對股價有更大的影響力。但較可惜的是，MSCI就唔會幫你篩選誰是全新，誰是升班或降班，要自己人肉查看，雖然青冰都算係勤力，但若遇上個市旺場，真係寧願去刨通告，都好過係度玩「找不同」遊戲。相對於MSCI，富時就體貼得多，每次季檢都有標示，究竟是否升降班的因素，還是全新加入。

下周一收市後正是MSCI成份股調整之時，當中泰格醫療（3347）、錦欣生殖（1951）、康龍化成（3759）及思摩爾（6969），都是全新加入而值得留意的，當中泰格醫療及思摩爾同樣被富時指數納入大型股指數，不過就要到12月18日收市後才生效，喜歡細股的可以睇實祖龍娛樂（9990），富時揀咗佢入小型股指數，而如無意外，佢都會係新北水標的。

青冰

http://www.fb.com/chingbing888

本欄逢周二刊出