【大茶飯】炒私有化憧憬勿忘呢隻（青冰）

今年私有化的例子極多，單是6月已經有五單。

記得年半前寫過哈爾濱電氣（1133），因為大股東曾提出私有化，當時亦都做了個簡單的統計，將每年提出私有化的公司作紀錄，最後發現H股公司獲提私有化，成功率是百份之百，所以當時對哈電，都有莫大信心，阿爺不打無把握的仗，但結果卻出人意表，哈電成為近年首隻甩拖的H股。

月初H股華電福新（816）獲提的私有化，停牌前是1.51元，最後出價2.50元，溢價達65%，以PB計，停牌前是約0.5倍，出價是0.85倍。今年私有化的例子極多，老牌港資都有會德豐（020）及利豐（494），單是6月已經有五單，金茂酒店（6139）、金衛醫療（801）、凱普松（469）、越南製造加工（422）及華電福新，仲未計近日因收購合併事宜申請停牌的股份。

一如近期青冰常說，貴股好貴，殘股好殘，殘股看來就只有私有化一條路，才可引起市場垂青，現時PB低過0.4倍的股，實在太多，要搵個合適對象下注，就似大海撈針，但今年春江鴨在捕捉私有化股，都成功率甚高，華電福新停牌前兩日累升14%，金茂酒店停牌前三日更累升38%。

華電福新公佈私有化後，刺激了同是H股的哈電急升，6月至今已升逾四成，睇返哈電係去年7月19日宣佈私有化失敗，至今都未夠一年，程序上要等多幾星期，才可再提私有化。哈電去年7月仲係4蚊，宣佈失敗後一個月已跌穿兩蚊，今年3月的環球股災，更一度低見1.45元，雖然現時由低位反彈近倍，PB仍只有0.29倍，係極之咁低殘。在2018年宣佈私有化而最終失敗的股，除哈電外，還有國浩（053）及寶勝（3813），兩者在去年已經收復所有失地，後者更在去年創歷史新高，真係唯獨哈電咁憔悴。

哈電去年失敗皆因出手低

哈電去年之失敗，主因係出手低，去年的出價4.56元，只係約0.5倍PB，但最終都有88.32%股東接納，離90%的門檻只欠半步，差啲偷雞成功。可能這失敗個案嚇怕同路人，自此之後的H股及紅籌股私有化，出手都較疏爽，中國自動化（前編號569）、中國電力清潔能源（前編號735）、中國糧油（前編號606）、中航國際（前編號161）及華能新能源（前編號958），全部都成功而回。下月中哈電滿一周年時，未知會否即時出手，但近期股價強勢，反映市場已投下信心一票。

青冰

http://www.fb.com/chingbing888

本欄逢周二刊出