雅虎香港財經 太唔是何｜一單銀行轉帳 搞咩要搞成日？｜400歲人瑞
話說400歲人瑞喺好多年前都做過香港某間大銀行嘅銀行櫃員，對「多年前」香港嘅銀行分行服務同運作都有一定嘅認識。最近就喺同樣係國際金融中心嘅倫敦享用咗一次難忘嘅銀行分行服務，又同大家分享下。
早前人瑞需要做筆大額轉帳，好自然咁喺電腦上面嘅網上銀行試下先啦，點知話大額做唔到，但又唔識設定個轉帳上限，如是乎就打電話去客戶服務問下點做啦。一問之下長知識，原來嗰間銀行做£25,000至£50,000嘅轉帳，係要用手機APP設定當日嘅轉帳上限，然後才可以喺手機度做個轉帳，完咗嗰日或完咗一單交易之後，嗰個轉帳上限又會自動轉返去£25,000或以下，用電腦嘅網上銀行，係做唔到㗎！
咁£50,000以上嘅大額轉帳呢？原來係要親身落分行㗎！仲要係有「全面服務」嘅分行，因為英國有好多銀行分行可能都只提供有限度服務，有個人「棟」喺度俾你問下嘢咁，又或者係sell下嘢咁。好啦！咁千里迢迢去咗倫敦市中心一間大分行。香港人去香港嘅銀行做轉帳，好自然就會排櫃位啦係咪？咁人瑞排咗一陣櫃位就排到：
人瑞：唔該我想做單大額轉帳
櫃員：係咪超過£50,000嗰啲？
人瑞：係呀
櫃員：唔好意思，請你去返門口接待嗰度搵同事幫你吖，我櫃位做唔到大額轉帳㗎！
好啦，咁原來門口接待處又有另一條隊，咁又再排啦，卒之又排到：
接待：先生您好，請問有咩可以幫到您？
人瑞：你好呀！我想做單大額轉帳
接待：係咪超過£50,000？
人瑞：係呀！
接待：先生有冇身分證明文件？
400歲人瑞就遞咗張車牌俾佢，接待又問要轉幾多錢、轉俾邊個、咩原因要轉錢等等嘅問題。即係咁，其實後面仲有幾個人排隊嘅，講乜嘢都俾佢哋聽到晒⋯⋯
接待於是叫400歲人瑞坐埋一邊等一陣，佢同事一陣會嚟幫人瑞。咁等咗一陣，有另一位職員行出嚟就招呼入房嘞。坐好咗之後，呢位職員又重覆返頭先嗰位接待嘅問題：轉幾多錢呀？轉俾邊個呀？點解要轉帳嘅？然後又會問下其他問題：呀先生您嚟咗英國幾耐呀？覺得呢度生活點呢？而家嗰度住得幾好嘛？⋯⋯呢啲諸如此類嘅問題，以及關於呢次「轉帳」嘅背景資料，同埋呢度有好多詐騙㗎！你真係要確定要轉錢？好「關懷」咁款。
400歲人瑞當然知道佢做緊乜啦！除咗提醒要小心俾人呃之外，仲要做好KYC！不過就同當年喺香港嘅做法好唔同！喺KYC方面，以前喺香港做櫃員，就會好直接好快速咁問幾個問題，抄底身份證號碼（同暗地裡幫個客影相）就算，條隊咁長（好多年前網上銀行仲未流行嗰陣，銀行分行係好多客嚟排隊嘅），無機會同個客吹水啦。職員喺部電腦度篤篤篤咗一輪，然後就喺一張A4紙上面印咗今次交易嘅資料，叫400歲人瑞喺上面簽個名：
職員：唔該晒！咁我哋會將呢單交易指示交上中心，佢哋審查完無問題就會喺今日辦公時間完結前幫你過數㗎啦！
人瑞：啊！原來唔係即時過數㗎？！（心諗：你同我吹咗咁耐水，問咗咁多嘢，都仲要審查？！）
職員：唔係㗎！不過你放心啦，無問題嘅話通常兩個鐘都會搞掂嘅！
人瑞：啊！咁幾好喎！我真係唔該晒您呀！
職員：唔好客氣！
400歲人瑞心諗，後生時做櫃員，呢啲大額交易，篤篤篤五分鐘就搞掂啦，入數嗰邊戶口仲可以即時收到錢（相同銀行嘅話），你而家講要兩個鐘？！反過嚟睇，呢度係國際金融中心，所以自然喺防洗黑錢同防詐騙方面盡量做到足，跟晒程序法規處理，鞏固多年以來建立嘅地位，無可厚非㗎！
所以，提提您，大家如有大額轉帳需要，記得要預備充足時間啊！
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請往Facebook專頁：https://www.facebook.com/thames400
