雅虎香港財經 太唔是何｜住在倫敦是否需要買車？｜400歲人瑞
400歲人瑞喺未嚟到英國之前，喺香港一直擔心嚟到英國要揸車。人瑞本身喺香港有一張超過20年嘅「雪藏牌」，嚟英國之前都特登花咗幾個星期日喺香港嘅路面補補鐘，同埋上網睇下英國嘅車價。嚟到英國之後，再一步一步考慮，係咪真係需要買架車揸。
結果，人瑞嚟到倫敦生活咗超過一年，仍然無買車，亦暫時打消咗買車嘅念頭。今日就同大家講下，人瑞喺倫敦嘅「無車」生活，係點樣過。
無錯，其實如果喺香港無揸開車，嚟到倫敦都盡量唔想揸車，所以喺日常生活嘅思維方式同諗嘢方向，都係無私家車呢樣嘢喺自己嘅腦海入面
一開始搵地方住嘅時候，人瑞會將「交通方唔方便」放埋入搵屋嘅考慮因素。所以開首住嘅租盤，15分鐘步程都有條經常失驚無神停駛嘅火車線出市中心，10分鐘步程內亦有兩三條巴士線去附近嘅商場同超市
無私家車，買嘢返屋企就無咁方便，人瑞又唔想拖架「買餸車」去買嘢（因為同人瑞個形象唔夾），所以通常會拎住裝滿「戰利品」嘅環保袋喺巴士站度等巴士
無私家車，熱浪下搭巴士搭地鐵令人瑞瞬間回到讀書時搭熱狗返學嗰個青春時代，冬天等巴士就凍到唔識形容
無私家車，下下出市中心、去其他市鎮、去朋友度，都要坐架失驚無神會取消班次嘅火車（有時甚至全日取消服務），又或者坐好耐嘅巴士
局搭公共交通工具，就要局俾錢，巴士唔理遠近每程一律收£1.75（倫敦價），火車地鐵當然要再貴啲，有時出一次市中心來回就要超過£10，每次搭公共交通工具都會懷緬下香港嘅車費⋯⋯
無私家車，想去行山或去附近旅遊，都要諗過度過，至少要有公共交通到嘅地方先去得
無私家車，去邊度都要比其他有私家車嘅人耐同埋花時間
無私家車，可能同鄰居又少一個話題可以傾計
人人都話喺英國揸車平過喺香港揸好多，停車費、油錢呢啲都平過香港，無私家車，就真係感受唔到呢種小確幸
無私家車，所以嚟咗倫敦超過一年，都無離開過倫敦或附近地區，成日聽到倫敦朋友話揸車去伯明翰、去牛津、劍橋、利物浦、碧仙桃，甚至去法國，都感到羨慕
之不過呢⋯⋯亦因為無私家車，人瑞買完嘢上咗巴士個腦就可以一片空白、又或者碌下手機睇雅虎財經英鎊兌換價，完全唔駛再花精神去睇路面情況
無私家車，所以條路有幾窄有幾多車泊喺度塞住晒，人瑞都可以外判俾專業嘅巴士司機處理，將「揩花人哋架車嘅風險」轉嫁俾佢哋（人瑞以前以為香港啲路已經夠晒窄，原來真係小巫見大巫）
除咗「揩花人哋架車嘅風險」之外，英國嘅路面出晒名夠晒爛，對車嘅損耗唔講得笑，同樣呢個成本都轉嫁咗俾公共交通工具
有時喺網上都會睇到網友分享俾停車場扣錯錢、又或者買咗保險但遇上交通意外唔賠之餘保費仲加咗，人瑞如果有私家車，一定會喺呢方面嘅經濟貢獻巨大
除咗油錢、停車場錢、車保之外，人瑞仲可以慳埋啲洗車錢（或洗車嘅時間）、汽車用品嘅錢呢啲濕濕星星嘅支出
無私家車仲可以充分發揮「阿Q精神」——唔駛擔心架車又或者架車啲零件會俾賊仔偷咗去（喺香港係咪成日都聽到話英國治安差呢？！）
仲有唔駛擔心俾人失驚無神影快相交超速罰款，雖然人瑞應該都唔會揸得快
無私家車但又想盡情購物，人瑞而家就會照樣出街Window Shopping兼記低自己想買乜，然後返到屋企上網買叫佢送上門，唔駛自己搬之餘，仲可以諗清諗楚先決定買定唔買。至於日常買新鮮餸菜，就繼續親身去街市或超市去揀去買再拎返屋企。咁就無咁重嘞！
後來人瑞再搬屋時，加強咗「交通方便」嘅考慮，而家住嘅地方對面馬路就係有三條鐵路線經過嘅車站（兩條地上鐵、一條地下鐵），出市中心最快15分鐘就到，5分鐘步程內嘅巴士線有超過10條，去附近多間超市同商場都比以前方便得多
嚟到倫敦住，買唔買車揸，除咗好睇個人喜好之外，仲好視乎住嘅地方係咪方便。交通好方便嘅地方，例如人瑞而家住緊嗰度，反而有車會變得唔方便，因為呢一區正在逐步推行減少車輛嘅政策，住緊嗰幢新起嘅大廈就無「住客車位」呢樣嘢，如果有車仲要頭痕將架車泊去邊度㖭。當然，如果住喺啲無咁方便嘅地區，揸車就有其必要嘞。雖然呢篇主要係人瑞分享對買車揸嘅睇法，但希望大家都能夠側面睇到喺倫敦生活嘅點滴啦！
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請往Facebook專頁：https://www.facebook.com/thames400
