如果政府派糖
自我定位為「眾人阿媽」的娥媽,據傳為紓緩現時緊張形勢會考慮推出派糖措施,咁如果政府要緊急派糖,可以點派先最符合管治成本效益?
首先幾肯定係政府應該不會再推資產審查式派錢措施,皆因四千蚊計劃劣評如潮,負責的職津處到本月頭仍只批出31萬宗申請款項,根本難以承受新一波的派錢措施。
唔用職津處又想派錢,最簡單方法就係重用當年六千元計劃人人有份舊招,並讓市民可以經銀行申請。這方法除了可以提升效率,亦有助支持港元。皆因唔計有人發動提取港元轉美金大行動,事實上近期港元走資風險持續升溫,要穩住港元,政府派錢時可以鼓勵銀行推出先導優惠,以息誘市民加碼港元存款,當派錢對手時,就可以憑存款證明額外領取政府加碼的派錢優惠,上限五舊水,假設今次每人派二千,多五舊水額外甜頭就很可觀了,照計不少人都會為了這五舊水而留守港元存款。
唔想派錢,另一門路係從寬免差餉入手。雖然差餉物業估價署講明差餉收入用作公共開支,但又提到其中一項係維持警隊服務。要知道警民關係咁緊張,或有人又會發起罷交差餉或分一百張支票交差餉之類行動。要防範風險不如政府自己行定多兩步,預告寬免未來兩年差餉並要較今個年度加碼,放棄三點幾%收入,就掃除一大不合作運動藉口,划算也。
當然搞得差餉寬免,娥媽「視如己出」的年輕人又會怨唔公平,咁年輕人粒糖最好從公開試入手。以香港財力,年輕學子考公開試仲要自費實在羞家,就倒不如公告把幫學校DSE考生代繳考試費措施恆常化。此舉涉及開支二億有找,就可以用行動表達年輕人一點「心意」,娥媽何樂而不為 ?
===============
精選資訊網站「中環街市」 臉書粉絲頁