香港股市 將收市,收市時間:5 小時 16 分鐘

我放棄$68,000人工 情願慳啲想要返人生

職場

文 :不覊

好多人埋怨而家嘅香港,冇機會冇出路冇希望,搵唔到錢。我承認後生一輩係辛苦,機會好似無以前咁多。物價樓價係咁升,但Fresh Grad 人工起薪又真係好多年都係咁多。

延伸閱讀:

兩位90後靚女YouTuber 有人唔做空姐轉行 有人月賺$7萬

晚晚要OT勁辛苦 捱壞身子邊個可憐你

人工高都唔敢買樓

對於我哋呢啲中佬來講,早咗廿年出世係好啲,無論人工同機會都好似比而家多係真。仲要家陣好多行業老闆都諗縮數,年年同你簽約,做Temp果種滋味我未試過,但我真係聽過有後生話自己成三張幾先至冇得續約,你叫佢去邊樹搵返份工?

人生咁唔穩定,當你份人工好高,你都唔敢買樓啦,係咪咁話先。
我唔想評論家陣啲細路係咪HEA住做人,好老實講,我捱到今時今日,算係中層高少少,見過亦請過唔少後生仔,廢到無輪份糧月月清仲要問老豆老母攞錢,人生無目標的,我的而且確係見過。

後生仔一樣好上進

但講句公道說話,年青肯學肯做有上進心的後生仔,我亦遇唔少,所以,唔好一竹竿打一船人,好多後生仔其實真係咁係咁差的。
唔好講後生住,講返我自己。打咗成廿年工,U Grad 由一萬蚊人工捱起,我哋呢行一向都係排櫈仔﹐只要你醒醒定定,冇乜差池,咁就年年加人工,幾人升一次。不過,近年其實真係愈來愈難撈,開始經常要OT之餘,上頭亦愈來愈難服侍。

唔好估我做邊範喇,亦都無謂去估,事關,今個月頭,我已經正式辭~咗~職。
做到我呢個 Grade,人工 $68,000,垂位亦唔低。係捱咗廿年得來的回報。

晚晚OT 到11點幾

你可能會話,乜咁浪費呢?人工咁高,出到去風高浪急,你又人到中年,真係好難再搵返一份咁高人工。
係,真係嘅!查實我都係諗咗好耐,先做出呢個咁難嘅決定。
我同你講,老細俾得呢個人工你,一定無死錯人。近年一年,我晚晚OT 到11點幾,有時連Lunch都冇時間食,每個月頭例必比佢捽數。
果種壓力大到,我幾乎晚晚瞓唔著,都係諗住公司嘢。我試過一係連續成個星期食唔落嘢,一係就狂食狂飲。

醫生話我壓力太大

你問我點解會咁?連我自己都唔知點解。最終,我去咗見心理醫生,醫生咪話我工作同生活壓力太大囉,多啲休息,放吓假,抖吓。
但係當你放假都收到老細無敵追魂CALL時,真係放假都放得唔安樂,又點抖得到呢?
決定辭職,全因做護士的老婆支持我,我哋無仔女,層樓亦一早供甩,其實只要慳慳哋,我哋應該唔會餓死。
有時候我諗自己辭工係咪好自私,大家都係香港人,都會知香港醫護人員工作壓力有幾大,我見老婆返工捱得都好辛苦,都好心痛。

男人最緊要有好老婆

但男人最緊要係咩?係娶到個好老婆,佢見我有啲神經質開始,於是叫我抖吓。 係就係唔太捨得$68,000人工,但左度右度,都係命仔緊要,最後決定同老細講再見。
你咪以為我真係咁自私,我同老婆商量過,佢捱多幾年,都會唔撈,到時大家都未夠50歲,加埋啲積蓄,我哋會走坪洲住,果度偏啲細啲單位,$200萬有找,當係隱居咁啦。

四張尾五張就退休

係喎,家陣香港好似我哋呢一輩,好多都提早退休,邊有可能好似我老豆老母果啲,做到六十幾七十先。唔係你唔想做,而係時勢迫人,尤其我哋呢啲四張尾五張頭果啲,我身邊有唔少朋友已經退咗休,又或者半退休啦。
真係唔想唔做,而真係唔想無咗條命、無咗人生。有時候食幾多著幾多真係整定,唔到你恨。講完。

我有層樓值700萬 放租辭工去台灣夠食住生活

延伸閱讀:

年尾要做Appraisal 7個博加人工方法