【扮工收風】上司想辭職 下屬咁回應⋯⋯

好多人返工為搵食，但小編身邊有唔少朋友返工係為理想，就算升咗做senior、要管人，都好努力去維繫成個團隊的精神同士氣。就算公司對同事幾咁刻薄都好，上司朋友都希望自己做好啲、對下屬好啲，等軍心都穩定啲，有時仲會請吓下屬食吓飯，想同事做得happy一啲。

之但係鐵人都有軟弱時，正因為公司生意愈來愈差，上司三日唔埋就做咗老闆嘅出氣包，有一日心灰意冷下，就在team lunch不經意表達想辭職唔撈，點知下屬聽完一臉震驚，諗都唔諗就講咗句：「吓，咁之後咪冇人幫我哋頂？」

另一個同事就附和：「你唔好走啦，你走咗我哋一定OT到放唔到工。」呢個世界，真係你認真就輸了，尤其係感情，朋友以為自己對下屬付出真心，就會得到相應的回報，其實真係太天真。估唔到下屬到頭來只係當呢位上司係工作上的潤滑劑，對上司有意請辭，完全無絲毫不捨。

呢件事令原本已經陷入工作谷底的朋友更加唔開心，最後佢因爲失望，最後都決定遞信離開。而下屬當然冇乜太大感覺，話題已經轉到「希望新阿頭唔好太惡頂」、「唔做住喇，等新阿頭來先算」……職場尤如音樂椅，聽住呢堆冇人性嘅說話，朋友最後釋懷，慶幸自己走得明智。

【相關搜尋】 辭職後上司的5種反應

===================

19網輕鬆爆料熱線，歡迎舉報老細同事19惡行，立即click入去講畀我哋知啦