香港股市 已收市

【扮工收風】下屬自視過高 請老闆去自己婚禮

究竟一個打工仔有幾「唔知訂」,先至會有勇氣張囍帖,交到自己大老闆手中。 

有打工仔平時非常擦大老闆鞋,但佢本身絕對稱唔上係高層,只係低層員工,不過就非常擦鞋,一有機會見到大老闆,就會死逼埋去搭嗲,大老闆都好有禮貌咁應佢,有時仲講吓笑。可以因爲咁,呢位打工仔以為大老闆同佢有偈傾。 

舊年年底,呢位打工仔要結婚,竟然在公司某活動結束果一刻,衝上大老闆面前,話想請老闆去飲自己果餐,大老闆禮貌上恭喜佢,亦客氣咁講咗句:「有時間一定去。」 

呢位人兄就打蛇隨棍上,俾埋張帖大老闆,話請老闆食囍餅。上司同同事見證住呢個場面,都戥佢尷尬。 

婚禮當日,呢位人兄仲不斷叮囑兄弟姊妹幫手湊老闆,仲在主家席留咗個位俾老闆,點知搞完一場大龍鳳,最後大老闆都冇去到婚禮。事後惹來同事背後暗笑,仲傳到通街都知。  打工仔貴不在人工,貴在自知呀!以後唔好再做傻事喇!

===================

19網輕鬆爆料熱線,歡迎舉報老細同事19惡行,立即click入去講畀我哋知啦