香港股市 已收市

【扮工收風】同事跳槽唔講去向 上司散水餅都唔食

踏入秋季,如果有好路數都會轉定,但如果你上司係小器袋,就要小心因為唔講佢知轉去邊,而嬲你一世。

朋友公司上個月有同事遞信,上司問同事轉去邊,但同事非常口密咁唔透露,上司嬲到佢離職當日都仲嬲緊。 

同事遞信,唔少人第一個反應都會想八吓佢會去邊,大方啲嘅同事或者晨早簽晒約嘅同事,都唔怕公開自己嘅去向。但都有為數不少嘅同事,以各種原因hea過大家。 

原因包括「未簽約呀,唔講住」、「我都唔知過唔過到試用期,一陣講咗過唔到好瘀」、「新工小器呀」、「都係呢一行啦」、「細公司來㗎,冇咩好提」、「都係九龍返工啦」…… 

之但係同事或者俾你hea到,但一直lead住你嘅上司覺得你唔講佢知,就好大問題。可能怕俾大老闆問到唔知會冇面,又或者覺得下屬唔尊重自己等,開始諗好多嘢。 

據說呢位上司因爲得唔到答案,所以黑面黑到上頭頂,黑到同事last day佢都仲面燶燶,仲話自己減緊肥戒甜,連散水餅都唔食,其他同事都覺得使唔使嬲咁耐呀? 

但點都好啦,雖然轉工後你都唔會再見到佢,但山水有相逢,最後嗰日處理下好啲,如果唔係,都唔使旨意有回頭草食。

===================

19網輕鬆爆料熱線,歡迎舉報老細同事19惡行,立即click入去講畀我哋知啦