【扮工收風】同事last day HR話要收返晒用剩的卡片
某啲HR之所以乞人憎,除咗因為壓價,好多時更在於小家。就好似有朋友最近last day,又因為小事同HR炒大鑊。事緣係HR白紙黑字出email,要求同事交還用剩的卡片。
個email就係話,同事要在離職前的最後一天,交還工作證、醫療卡、所有公司文具,仲有用剩的卡片,令離職同事愕然到睥一聲。
朋友睇完個email勁唔憤氣,於是email覆返HR,同佢講沒有用剩的卡片,因為所有卡片已經派晒,點知HR覆返佢︰「根據HR的紀錄,你上個月尾先剛剛印了200張新卡片,無可能咁快派晒。」然後附加一句︰「離職同事不可再向他人派發公司卡片,否則公司會保留追究權利。」朋友睇完呢句仲嬲,再回敬一句︰「貪你卡片有寶咩!」
朋友最後都拒絕交還卡片,但呢件事就俾離職同事唱通街,大鬧HR小家,但亦有同事唔贊同,認為應該好來好去,冇需要為幾張卡片留下唔好印象。
如果係你,你又會唔會咁順攤交返晒啲卡片出來呢?
===================
19網輕鬆爆料熱線,歡迎舉報老細同事19惡行,立即click入去講畀我哋知啦