【扮工收風】為偷懶假傳聖旨:「老細話你哋負責」
職場上做嘢,好多時都係你推俾我、我推俾你,之但係為咗推job而假傳聖旨,到最後穿晒煲,就真係夠晒樣衰。
朋友公司某部門做嘢分晒唔同team,就咁睇以為好有架構,但其實容許咗一班懶人將自己工作推得一乾二淨。
話說最近有經理竟然夠膽死走去同另一位經理講:「我之前喺出面接咗呢單嘢,同老闆傾咗,老細話呢樣嘢應該歸你哋負責,你ok我就pass返俾你。」
你拎到老闆出嚟撻人,同事邊有得唔ok,至慘係接咗job之後開會,老細第一句就問:「點解呢壇嘢會去咗你嗰度。」
「點解呢壇嘢會去咗你嗰度」呢句,相信大家有返咁上下年資嘅,都應該聽老細問過﹗
呢個時候,呢位同事先驚覺有人假傳聖旨,中晒伏。
最後,老細以「公眾地方打交」原則,開地圖炮大家都剷咗一輪。
受害經理無端端捱鬧當然唔gur啦,同事仲唔將呢單嘢唱到周街都知咩。敢問以後仲邊有同事敢接呢位經理派嘅job先?
===================
19網輕鬆爆料熱線,歡迎舉報老細同事19惡行,立即click入去講畀我哋知啦