香港股市 已收市

【扮工收風】要幫老闆做路線圖

如果你老闆係一個路痴,咁你會點?朋友依家做緊份工,就係遇到呢種老闆,因為成日要周圍出去開會,但唔識路,所以永遠要同事幫手做地圖,認真吹脹。

聽朋友講,所謂嘅地圖並唔係就咁將地址打上google map嗰種,而係要同事親身去現場,由老闆落車嗰一刻開始影相,逐個轉角位影,門口位要影,廁所位置要影,連邊度搭lift,邊度上扶手電梯都要影,到入咗lift,撳幾多樓個掣都要影埋,超誇張。

當影完相之後,同事就要返去做powerpoint,還原成個路線圖,將啲相拼來拼去,加埋文字描述,先至叫做完成任務,成為一張啱老闆心水嘅路線圖。

朋友基本上一星期至少做3份路線圖,有時趕唔切去現場就叫朋友幫手影,再send相。呢份工唔易做呀!

===================

19網輕鬆爆料熱線,歡迎舉報老細同事19惡行,立即click入去講畀我哋知啦