雅虎香港財經 操盤手札記│「黑五」無爆買 消費股黯然（割柑人）
上周五係感恩節翌日Black Friday（指商戶促銷後帳簿由赤字轉黑字），美國投資者好睇重呢日，會睇實消費股。據Adobe Analytics數據，上周四感恩節，美國消費者網上消費額為56億美元，比上年多5.5%；上周五Black Friday料為96億美元，比上年多5.7%。不過，Adobe預計，未來兩個月美國電商收入按年只增4.8%，增幅雖比上年高，但遠低於疫情前嘅13%平均增幅；另外，Salesforce更預計，11月同12月美國電商收入按年只增1%，係至少5年最低增幅。
美股外幣即時報價 多國新聞任睇
今個購物季消費者唔再瘋狂購物
感恩節標誌聖誕新年購物旺季開鑼，今個購物季市道如何？現時嘅數據大多追蹤網上銷售，實體店銷售數據要稍後才公布，但現時嚟睇，今個購物季消費者唔再瘋狂購物，雖然Adobe、Salesforce追蹤嘅交易唔同，預計嘅增幅因而唔同，但預測嘅軌跡相似。喺通脹同高息下，消費者撳實荷包，等待更大折扣；而零售商今年早已打折，若直到年尾都在打折，甚至畀更大折扣，將會削弱利潤，並會喺明年初公布嘅業績反映。
中美關係止跌但未回穩
美股Black Friday半日市，道指升0.3%、標指升0.1%、納指跌0.1%；金龍中國指數升1.6%；港股ADR比例指數高水108點或0.6%。美債孳息回升，10年期債息逼近4.5厘，高見4.494厘，收4.471厘，升6點子；美滙指數回軟，收103.42，跌0.5%。美債孳息、美元滙價（尤其兌人民幣）、中美關係，在在影響港股，港股舉頭三尺有三把刀！中美關係喺「習拜會」後止跌但未回穩，美元喺市場押注加息見頂下回軟，但債息跌唔落，港股後市仍難樂觀。
港股上周四拗腰反彈後，上周五又插水，過去兩個半月不時係咁，典型上落市。恒指以接近全日低位收市，跌351點或2%，收17559。恒指回吐考驗20天線同50天線支持力度（現分別喺17567、17591），若短線未能重上20天線，或將下試上升通道底部17000水平。港股連月上落市，可能要等中共三中全會、中央政治局會議、中央經濟工作會議，以至美國聯儲局議息，有好消息先有動力殺上。
騰訊管理層如風險基金
利率期貨顯示，對美國聯儲局下月中同明年1月尾議息，市場押注繼續凍息機會分別高達95.5%、87.6%，並預期明年6月開始減息。不過，睇返美國經濟數據，上周三出爐嘅首次申領失業救濟人數低過預期同前值、上周五出爐嘅服務業PMI初值高過預期同前值，反映就業市場並非如市場同聯儲局所預期般快速降溫，但長時間嘅高息環境已對經濟構成壓力，加息周期極大機會已結束。
科技股對息口較敏感，一旦減息，反彈力度亦較大。港股中嘅藍籌科技股，騰訊（0700.HK）最為穩陣，一來市值最大，二來佔恒指比重最大，三來業務瓣數最多，管理層有如風險基金般，不停去搵有潛質而未上市嘅公司嚟投資，待其上市賺取厚利。騰訊現價321.2元，睇走勢圖，呈現杯柄形向上突破利好訊號，有機會出現新嘅上升趨勢。
本欄隔周一刊出
