操盤手札記│個個都講減息 唔通個個都想減息咩（割柑人）

美國就業市場惡化，市場預期儲局減息步伐將會加快。 (z_wei via Getty Images)

血色星期五！上周五環球股市腥風血雨，喺亞洲，日股跌5.8%，台股跌4.4%，韓股跌3.7%，港股跌2.1%；喺歐洲，泛歐STOXX指數跌2.7%；喺美國，道指一度跌989點或2.5%，收市跌610點或1.5%，標指跌1.8%，納指跌2.4%，追蹤美國上市中概股表現嘅中國金龍指數跌1.8%，而俗稱「恐慌指數」嘅VIX指數則升穿長期平均水平20，一度急升59.5%至29.66，係上年3月以嚟最高，收23.39，仍升25.8%，係2021年11月以嚟最大單日升幅。

下載Yahoo財經APP

美股外幣即時報價 多國新聞任睇

減息不利銀行淨息差收入

市場驚咩？主要有二：①驚經濟衰退；②驚套息交易拆倉。環球股市殺跌始於上周四，已連跌兩日，呢兩日有咩事？①隨着上周三日本央行加息0.15厘，日圓連日急升；②美國聯儲局凍息，但主席鮑威爾放風最快9月減息，市場擔心屆時美國減息而日本再加息，日圓再急升，拆倉潮再現；③英國央行啟動減息周期，減息0.25厘，係疫情爆發4年幾以嚟首次，並預警經濟疲弱；④美國勞工數據全面轉差，包括首次申領失業救濟人數、失業率、非農新增職位等，經濟衰退陰霾籠罩。

日本加息，日圓升值，不利日股，亦不利環球股市，皆因過往日圓長期近乎零息，吸引全球投資者借日圓炒股，日圓升值引發環球拆倉潮，拖冧股市。順帶一提，雖然日股上周全周計跌4.7%，但若以美元計價，則近乎平收。至於英國減息，最不利銀行淨息差，上周四英國出手前，港股尾市已見資金偷步減持滙豐（0005.HK）、渣打（2888.HK）；美國減息在即，「股神」畢菲特旗下巴郡（BRK）亦先行沽出銀行股，7月17日至8月1日，連續12個交易日減持美國銀行（BAC），套現38億美元。

美國就業市場惡化，市場預期儲局減息步伐將會加快，皆因消費約佔美國GDP 70%，就業市場惡化，民眾收入減少，消費支出隨之減少，波及企業，危及經濟。利率期貨顯示，9月減息機會達100%，減0.5厘機會為74%，減0.25厘機會為26%。摩根大通、花旗預計，9月、11月將分別減息0.5厘，12月再減息0.25厘；高盛則預計，年底前將減息3次，每次0.25厘，若8月就業數據仍弱，9月可能減息0.5厘。

「股神」畢菲特旗下巴郡（BRK）亦先行沽出銀行股，7月17日至8月1日，連續12個交易日減持美國銀行（BAC），套現38億美元。 (UCG via Getty Images)

滙豐渣打業績勝預期照跌

美國快將啟動減息周期，本來利好環球股市，但睇上周，炒減息都無啖好食，點解？①縱使美國減息當前，但日本加息，意味市場炒作成本上升；②熱炒嘅市場累計升幅唔少，投資者套利撤出風險資產；③美國減息背後，隱現經濟衰退陰霾。美國過往10次衰退，都喺加息周期過去啟動減息之後發生，皆因利率政策傳導需時，經濟數據有滯後性，所以當儲局趕緊減息時，經濟實已出事。

對環球央行嚟講，減息與否，有如莎士比亞名句：「To be, or not to be, that is the question.」對投資者嚟講，減息亦唔一定係好事，如果減息伴隨住經濟衰退，經濟唔好勢必影響投資回報。老實講，個個都講減息，唔通個個都想減息咩！例如揸住銀行股，尤其國際銀行股嘅股民，上周睇見滙豐、渣打喺業績、回購都好過預期下，上周四、五照捱沽（前者兩日累跌6%，後者兩日累跌7.2%），咪話唔心噏。

割柑人

www.fb.com/hkstockpicker

本欄隔周一刊出