雅虎香港財經 操盤手札記│戰火燃起通脹 銀行股成贏家（割柑人）
兩大因素夾擊，市場兵慌馬亂！兩大因素係：中東戰局、美國通脹。先講中東戰局，上周五美國總統拜登預警，伊朗快將攻擊以色列，以報復駐敘利亞大馬士革大使館前周一（4月1日）遭導彈襲擊。拜登強調美國會致力保衛以色列，據彭博社引述知情人士稱，伊朗最快24至48小時內發動攻擊，當前局勢係上年10月以色列同哈馬斯開戰以嚟最緊張。果然，伊朗喺上周六晚起連續5小時向以色列發射170架無人機、30枚巡航導彈及120枚彈道導彈，係伊朗首次直接攻擊以色列領土。同時，伊朗盟友黎巴嫩真主黨同也門胡塞叛軍亦對以色列發動攻擊，前者向以色列佔領嘅戈蘭高地發射火箭彈，後者向以色列領土發射無人機。
美股外幣即時報價 多國新聞任睇
以色列據報將採「前所未見」回應
伊朗外交部發聲明稱，是次攻擊係行使自衛權，如有必要，將毫不猶豫採取更多行動；伊朗駐聯合國代表團則稱，是次攻擊可視為已結束，但若以色列再犯錯，伊朗反應將更激烈。美國總統拜登縮短特拉華州行程，提早返回白宮喺戰情室會見國家安全顧問，會議隨後結束；不過，拜登同以色列總理內塔尼亞胡通電話後又重新召開會議。據美國官員稱，以色列安全內閣已授權戰爭內閣就如何應對伊朗攻擊作出決定；另外，有以色列匿名高官表明，將對伊朗展開「前所未見」嘅回應（執筆之時未知以色列如何應對）。
通脹跌唔落 減息未得住
再講美國通脹，上周三出爐嘅3月CPI按年升3.5%，高過預期，按月升0.4%，亦高過預期；剔除波動較大嘅能源、食品價格後，核心CPI按年升3.8%，高過預期，按月升0.4%，亦高過預期；聯儲局主席鮑威爾好重視嘅「超級核心CPI」——剔除能源、食品、住房價格後嘅核心服務CPI，更按年升5%，係上年4月以嚟最勁。通脹跌唔落，減息未得住！上年底鮑威爾喺議息中放鴿以嚟，市場已由今年初估年內減息7次，不斷下調，由6次、4次、3次，到最新2次，甚至有估唔減。
戰爭推高油價，通脹更難回落，更甚嘅係，喺市場擔心中東戰局之際，美國能源信息署（EIA）調高今年全球石油需求預測至每日1.0291億桶，即每日26萬桶供應缺口，求過於供，油價趨升，意味生產成本趨升，並將推高物價。打仗通脹夾擊，上周五美股三大指數收跌1.2%至1.6%；紐約期油高見每桶87.67美元，今年以嚟累升22.4%，收85.45美元。資金湧入美元、美債、黃金等避險資產，美滙指數升穿106關；債價升債息跌，10年期債息回至4.52厘；現貨金高見每盎司2,431.53美元，但投資者亦押注緊張局勢唔會持久，高位沽貨，金價倒跌收2,344.25美元。
追蹤美國上市中概股表現嘅納斯達克金龍中國指數大跌4.6%；港股夜期低水246點或1.5%，ADR比例指數低水256點或1.5%，不過，今日港股跌多跌少，端視局勢發展。睇返上周五港股走勢，恒指低開低走，以全日低位收市，報16721，成交增至1,062億元。過去一個月，恒指呈橫行整固形態，上周受制前頂17200水平，即上年12月以嚟營造嘅「頭肩底」嘅頸線，短線若跌破1月以嚟上升通道底16600水平，將回試前底16300水平。
回購派息增 滙豐有睇頭
減息不似預期，息口繼續higher for longer。受惠於高息長掛嘅本地銀行股中，上周五滙豐控股（0005.HK）喺連升5日累升5.6%後回調1.6%，收63.8元；恒生銀行（0011.HK）更逆市升0.2%，收98.5元；中銀香港（2388.HK）則回調1.3%，收22.75元，三者仍喺近期高位。基本因素嚟講，本地銀行股除因息口higher for longer有利淨息差表現外，更受惠於股份回購、派息增加，以及樓市撤辣有利按揭業務等利好因素，可睇高一線。
當中，滙豐2月時公布由2月23日至不遲於4月26日期間啟動新一輪股份回購計劃，回購20億美元普通股並註銷，之後的確無停手回購。至於派息「鬥增」，滙豐上年全年派息大增九成；另外，滙豐3月28日完成出售加拿大業務，預計首季確認出售收益49億美元，擬於4月30日刊發首季業績時，一併宣布派發每股0.21美元特別股息。據彭博綜合券商預測，滙豐2024年預測息率9.5厘，本地銀行股之最。
本欄隔周一刊出
